Hadien wa mih boon i dawa wow yada yaka wah Myntdu nadooh na ka Synjuk ki Waheh Chnong Jowai wa kiwi, khamtam naka seiñ Khooid Ya Ka Wah Myntdu kawa man ka seiñ wa da chna kyrpang du neibynta u thooh ki laad ki luti hajrong kammon u yada yaka Wah Myntdu kawa man kawa pyndap umbaam umdih yaka chnong Jowai kamjooh pybiang um ko ya ki lyngkha.
Kamtæ ynne ka sngi neiliang u DC ka West Jaiñtia Hills District da khut u yaka seng Khooid Ya Ka Wah Myntdu, ka chnat PWD, ka Divisional Soil & Water Conservation, ka chnat Urban, DFO (T) wa kiwi yow hiar sylli yei man i long ka Wah Myntdu kawa da chah ktah ha kiwa boon rukom.
Heini i hiar sylli neiliang ka bor District da mihkhmat da u Additional DC u L. Kynjing. Yei sylli da sdang nadooh na sarok Jowai By-pass ha chnong Mihmyntdu neibhah wa ha kini ki bynta, ka wah da sdang khian ko nei oor ki khyndaw neiwa chna sarok.
Chooh chooh rap cha wah, ka wah Myntdu da chah ktah haroh ko nei pynkai tngit wa mih na yung bru, i noh taroi yei jhep, i sait that hapoh wah, i khloh moo, i tih chyiap na wa harood ka wah.
Ka wah Myntdu wym du wa pyndap umbam umdih ko yaka chong Jowai, tangwa pynbiang um haroh ko ya ki warep wa em ha chi lynter yong ka.
Kamtæ ha kani ka kynti ki warep leh da mih ki chakhmat wow pynsñiaw yei dooh nong neibhah wa boon ki nala um wa jooh pynpoi um cha ki thaw rep yong ki leh da jæd da pra ki.
Kamtæ lyngba ini i hiar sylli ki chnat krehkam waphær waphær wa kynthup nadooh ka yung krehkaam u SE PWD Road, u AEE PWD Road, Jowai Urban Sub-Division, AEE PWD Road Jowai Central NH, ka Urban, DFO (T) waka DS&WS, daw phah ki yaka bui (Report) cha u Deputy Commissioner ka West Jaiñtia Hills District hajrong i chem yong ki na ini i hiar sylli yong ki.
