U Lat ka Meghalaya, u Satya Pal Malik ynne ka sngi da lai hiar u cha ka Buddhist Monastery ki nong Tibet kawa em ha Upper Lumparing, Shillong. Ya u Lat da pdiang sñiawbha da u Tibetan Settlement Officer, u Pema Dhondup waka MP ka Tibet Parliament kawa da yut cha India, ka Tsering Dolma deilang wa kiwi de.
Hawa e yei klam, u Lat da ong u wa dap u dei sñiaw burom wow yoh u wan cha kani ka Monastery deiwa ong leh wa u Dalai Lama da wan yooh kjat u ha kani ka Monastery ha u snem 2014 wei da e buit u ya kani ka Monastery wow sdang ki da ka Cultural Learning Centre.
U Lat da ong u wa i thong wow booh ya kani ka Cultural Centre toh yow e yei sikai yong warim ka Nalanda wow man kiwa jem mynsien, kiwa em i sñiaw ya kiwi, kiwa em yei yai chah, kiwa smat u maap, kiwa man ryntih wei yow bood ya ka luti wa jai jai kawa yait nei pynmynsoo namo ka Ahimsa. Da yooluti u wa deiwa em kam kani ka Cultural Centre daw myntoi ko ya waroh kiwa kwah wow puræ Psychology wa i stat yong rim ka Nalanda yow wanrah yei bha i mait wa i suk i saaiñ hapoh ka imlang sahlang.
U Lat da yaroh u leh ya ki jaitbru Tibet ya ki kaam wa da leh ki neibynta u bru nadooh wow yarap baam ya kiwa dooh wa duk kamjooh wow e yarap cha ka Chief Minister’s Relief Fund heipor wa em ka khlam COVID-19.
Ha kani ka sngi da em leh ki pynwyrnigai da ki rwai ki chaad tynre da ki jaitbru Tibet.
