Kam chibynta u pyntikna wa ki kreh saam umbaam umdih man ki kiwa lai bait lai ryntih wei poi ki leh cha kut ki thlu yung. Ynne ka sngi u Montri ka chnat saam umbaam umdih ka sorkar jylla u Renikton Lyngdoh Tongkhar, da lai li pait lai sylli u yei pynkreh wa dang lai chakhmat ha chnong Thangraiñ wa haka chnong Barato, West Jaiñtia Hills District wa haap hapoh ka Laskeiñ Block chirup i synraan lang u MLA ka thaaiñ u Nujorki Sungoh, ka R. Kynjing Executive Engineer RWS Division Jowai, u S. Najiar SDO Sub-Division, PHE Jowai wa kiwi de.
Heini i lai li pait, neiliang u Montri ong u wa ini i lai sylli man i iwa emkaam bha, wei i pynkreh dang lai ko chakhmat, wei kam ha chnong Barato da sakhi wa da em leh ki manyung wa dapoi umkor hadooh ha yung.
Yei pynkreh ha chnong Thangraiñ da mang T. 9 klur tam, ha Barato T. 2 klur tam wei hadooh kamwa man kattæ i pynkreh ha Barato da pyndep 90% katwa ha Thangraiñ won dang 10%.
Heiyatoh wa kani ka Scheme ong u wa ye u em kattu katni ki yung wym em dap kamwa da pynkhreh, tangwa neiliang ka chnat da pynkhreh ko wow leh yaka mang poisa (Estimate) kyrpang yaki yung wym pu dap neidaw iwa thut (Technical Problem), neibhah wa ka sorkar kwah ko wa kawi pa kawi ka manyung u yoh yaka umdih.
Neitæ i lut wa emkaam u pyndap yow yoh ki yung wym pu dap da mang kamwa T. 20-30 lak haroh, wei da ong u wa kani dang man hi ko kawa biang wow sai naka poisa ka jylla namo ka State Fund.
“Kamwa ka Barato toh ka chong wa dang pynkhreh yaka yaseiñ Synod wow wan, sñiawthooh hi wa emkaam bha u yoh yaka umbaam, ye u man boi wym ye u pyndep lut waroh ki thlu yung chwa ka yaseiñ, tang kamwa da man ynne, yooluti wa ka chnat PHE u embynta lang ko wow thooh ki laad yarap ya kani ka chnong neibynta u pynbiang um la heiwon heiwon i rukom wa chipor leh,” ong u Renikton.
Hawa kylli la em hi mo iwon iwon i thut hajrong i pynkrehkaam ya kani ka Scheme, da jubab u wa hadooh katni ym pu em i thut, deiwa pynrap u wa wot ka sorkar bei leh dang mynjur ko u e yaka 90% ka bhah poisa kamjooh leh neiliang ka sorkar jylla da e ko yaka bhah yong ka.
Da pynkynmoo haroh u wa haki bnai wa dadep ka sorkar jylla da yoh yaroh ko naka sorkar bei neidaw wa ka sorkar jylla leh e ko yaka bhah yong ka heipor wa biang, wei neitæ i daw ka sorkar India da e tam (Bonus) ko kamwa T. 10 klur hapoh ka JJM Scheme.
