U MLA ka Jowai, u Wailadmiki Shylla ynne ka sngi da lai li pait li sylli u ya ar tylli ki thaw ha ki ar tylli ki chnong wa haap hapoh ka Constituency yong oo neibynta u chna noh ya ki thaw e sumaar næ Sub-Centre kiwa dadep mang kam chibynta u pynjan i chakri cha ki paidbah heiyatoh wa i chait i khiah.
Kini ki ar tylli ki Sub-Centre kynthup ki ya kawi ha chnong Sabahmuswang wa kawi ha chnong Ialong, wei hei lai li pait li sylli yong oo da emlang ki waheh chnong, ki dkhot chnong deilang ki bru napoh ka chnat yong i chait i khiah ka National Health Mission, West Jaiñtia Hills District.
Hawa klam cha kiwa thoh khubor, u MLA ong u wa dap u dei sñiawkmen neibhah hadooh kamwa man kattæ sa du kini donhi ki chnong hapoh ka Constituency yong oo wa da man biang u yoh Sub-Centre wei ym slem de daw yoh hi ki.
Yooluti u leh wa lyngba i ye u chna ya kani ka Sub-Centre daw pynmyntoi ko ya ki paidbah wa kjut wa chitom da iwa dang ye u sumaar ha ki Sub-Centre khamtam ya ki manbei wa punkhon.
Heiyatoh wa i chna ong u, iwa sah katte sa du wow pyndep ya ki kot ki sla neibynta wow yoh sdang kreh ha ki kajiak bnai wow wan, deiwa yooluti wa la kammon kammon hapoh 2 snem daw ye u chna pyndep.
Heijooh i por khana u wa da em leh i kyrpaad neiliang ki waheh chnong wa wot ya ki Birth wa Death Certificate leh toh u ye wow yoh noh na ki Sub-Centre.
Heiyatoh weini kular u wow rah yaklam hapoh ka sorkar neibhah wa kani toh ka bynta wa rap hakhlieh kawa tohlang ya waroh.
Discussion about this post