Hadien wa da pynsangeh ya ka Election ha Sohiong Constituency neidaw wa khlaad noh u kyrtong ka UDP, u HDR Lyngdoh heiwa ha kani ka Constituency da em 6 ngut ki kyrtong kawa dang haap ha East Khasi Hills.
Neiliang u CEO ka Meghalaya, u FR Kharkongor, da pyntip u wa ki kyrtong wow yaleh Election MLA 2023 da em noh ki 369 ngut heithaw 375 ngut kamwa da pynbna ini wa dep hadien wa da pyndep ya waroh iwa emkaam nadooh i thap pyrtuid, i sylli ya ki kot ki sla wei hadien wa da e por wow kynrandien ki kyrtong. Ki Polling Station leh da hiar ki cha 3419 tylli na 3482 tylli deiwa pyndam ya 63 tylli kiwa em ha Sohiong.
Ka East Khasi Hills dang man hi ko kawa boon kyrtong dooh kawa em 110 ngut ki kyrtong kamjooh leh ki Polling Station kiwa em 944 tylli.
Ka West Garo Hills da man ko kawa ar hei boon dooh ki kyrtong kamjooh ki Polling Station deiwa em 69 ngut ki kyrtong wa 537 tylli ki Polling Station.
Hei wa le da em ka Ri-Bhoi deiwa em 35 ngut ki kyrtong wa 331 tylli ki Polling katwa hei wa soo da em ka West Jaiñtia Hills kawa em 26 ngut ki kyrtong wa 306 tylli ki Polling Station.
Kiwa duna kyrtong dooh toh ha Eastern West Khasi Hills kawa em 9 ngut ki kyrtong ha ki ar tylli ki Constituency.
Neiliang u CEO ka Meghalaya da pyntip u wa ki bru wa kreh ha ki thaw thap Vote da mih ki nadooh ka 24 tarik yow lai cha jar jiar ki thaw heiwa ha South Garo Hills da mih ki nadooh i step wei daw hap ki wow lai kjat 8 Km yow poi thaw hadien wa kut u sarok wa hoi u lai kari.
