Hiar thma ki damok na Bangladesh, mynsoo wei chah knieh suloi ki BSF wa uwi u bru

Jowai: U SP ka West Jaiñtia Hills u L. Syiem da pyntip u wa ki pulit heipor 3 waje ynne I step ka 8 tarik da yoh yutip ki wa da em iwi i yung ha chnong Amdoh iwa em hajan u pood waka Bangladesh da chah lute i ha ki nong Bangladesh heiwa u OC ka Dawki PS chirup wa ki pulit da lai ki wut wut cha kani ka thaw.

Manda pynman yaka takit, da chem wa heipor kamwa 12 waje pyrdi synyaaw kamwa 10-15 ngut ki nong Bangladesh da poi ki cha i yung u Pratap Bareh ha chnong Amdoh iwa em hajan ka Rongtila BOP ka BSF wei kani ka chnong jngai ko kamwa 5 km na Dawki.

U tre yung manda sñiaw u ya kini ki nong Bangladesh da siat u ya ki chi kuli daka suloi (SBBL) tangwa kini ki nong Bangladesh da yoh ki wow knieh ya kani ka suloi wei da choh da dat ki oo wei da lute ki na yung u kamwa T. 30,000 wa artylli ki Mobile wei da rah ki leh ki yaka suloi u.

Ya u Pratap da kit cha thaw sumaar tangwa da pyllait noh ya oo pyn ynne ka janmiet neidaw wa da mynsoo u malum malæ na ki kha chah ah wa chah dat.

Da pyntip leh i thaw wa em i yung u Pratap toh iwa langam bha wei i daw wa chah ktah u ha ki nong Bangladesh ym tip wei ye u man wa da jia ini ya oo toh neidaw wa siat u ki wei du hadien wa pyndep yaka takit u tip ya iwa sakhiat.

Ha iwi tawon i jia ha i jooh ka miet, heipor 12:30 pyrdi synyaaw, ki nong Bangladesh kiwa em 10-15 ngut da kærkut ki ya arngut ki chipai ka BSF ka Rongtila BOP wei da choh da dat ya ki wei da knieh ki leh yaka suloi INSAS Rifle wa ki tadong kuli (Magazine).

Hadien wa thooh ki BSF ha i khloo wa em chajan da chem biang ya kani ka suloi deilang waka Magazine.

Related posts

Chah kem uwi chwa wow e kti yei Heroin wa khia 22.83 gram ha Shillong 

November 24, 2025

Kem ki pulit ya uwa pynyap bru ha Thangksoo

November 21, 2025

Ya ki arngut ki chipai BSF wa mynsoo da kit ya ki cha Dawki PHC yow yoh yei sumaar.

Neiliang u SP da ong u wa ini i jia ha kini ki ar thaw da leh da ki jar jiar ki damok Bangladesh ymtoh ki jooh kiwa lute ya i yung neidaw wa jngai kini ki thaw iwi na iwi katwa neiliang ki BSF da ong ki wa kini toh ki jooh ki bru wa lute.

Heiyatoh wa ini i jia, u Deputy Inspector General of Police (Eastern Range) Meghalaya da wan u cha Dawki wa cha i thaw wa jia yow pynbait ya i rukom pynkrehkaam yaka aiñ deiwa emlang u DC, SP, SDO, SDPO wa ki sahep ka BSF.

U SP da pyntip u wa daw pynjoor yei sonteri ya u pood da ki BSF wei ki pulit leh daw pynjoor ki yaka uiñ sonteri (Patrolling) ki cha ki sarok wa em chapoh chnong, wei da pynboon yaki pulit ha ka thaaiñ Dawki.

Da pynman leh yaka yachem (Flag Meeting) hapyrdi ka BSF waka BGB tangwa ym tip iyi mih na kani ka yachem.