Jowai : U Montri Rangbah ka jylla u Dr. Mukul Sangma kam chibynta wow pdiang ya ki 500 ngut ki dkhot yalehke na ka ri Bangladesh ki wow wan chimbynta ha kani ka South Asian Games ynne ka sngi 23 tarik da hiar u cha Dawki-Tamabil yow pyntikna wa biang i rukom pynkhreh yow pdiang yei wan ki nongyalehke na Bangladesh.
Ha ka yalang wa da pynman ha ka ophis ka Sylhet Chamber of Commerce ha Sylhet da pynman ya ka phyllu yumut hajrong ka phang “Exchange of Views” wei da rai leh u pynbha pynryntih yei rukom kreh ka ophis ka Dawki Customs and Immigration Center yow lai bait i psiah i mih ha pyrdi ki ar tylli ki ri. Yeini da kular ka ophis u Indian High Commissioner u chimkhia ko u leh.
U CM da kular u leh ya ki wa bha dooh ki thaw sah thaw baam ya kiwa wan uiñ sawari wei da pynkit ya ini ha u ma David Nongrum, Chairperson MTDC u wa emlang ha kani ka sngi yow kreh lang wa ki nongpyllai kaam uiñ sawari (tour operators) kamjooh wa kiwa pyllai thaw sah.
Kamjooh ka ophis ka Indian High Commissioner da kular ko u yarap ya ka jylla Meghalaya hadein wa da yoo ko yei sap ka jylla heiliang ki kaam uiñ sawari (tourism) iwa da pynsakhiat da ki kattu katni ki seiñ ki wa da wan pait wan sylli ya ka jylla.
Da kular ka High Commission u pynman ya kiwa boon ki kaam wow riñ ya ki nonguiñke pyrthai na ka ri Banladesh cha ka jylla Meghalaya.
U Dr. Mukul Sangma leh daw emlang u ha ka “Investors Meet” ka wa daw pynman ha ka 24 wa ka 25 tarik uni u bnai ha Banglaesh
Discussion about this post