“Hoi Hi Mo” i rwai wa da pynlait paidbah ha ka 18 tarik uni u bnai ha YouTube iwa da thoh da ka Lambhadaka Patlong iwa da rwai da uwa rwai wa pawnaam ka ri Jaiñtia u Ram Suchiang, da man i rwai wa da thoh kyrpang heiyatoh wa i jhep wada lang ha Iawmusiang, Jowai iwa da wanrah i yoo jakhlia chirup i sma i tung, iwa da ktah sakhiat yei chait i khiah kiwa chong chnong kamjooh kiwa lai yaw lai haat wa kiwa chongdai heijooh i por leh iwa ktah yei burom ka District waroh kawi.
Kam wow pynkynmoo wa ka Lambhadaka Patlong ini wa dep da pynlait paidbah ko lyngba u YouTube Channel Lambha Patlong ya iwi i rwai wa pyrtuid Khon Khadduh. Wei ini toh i sien wa ar wada pynlait paidbah ko yei Music Video lyngba kani ka YouTube Channel yong ka.
Hawa yoh u yaklam waka Lambha heiyatoh wa ini i rwai wa thymme wa da e pyrtuid “Hoi Hi Mo”, da batai ko wa hadien wa yoo ko yei eh kiwa lai wa wan ha Iawmusiang wa hap u tymmoh khmut wada joor ware i sma, kamjooh ki hajar tylli ki pharæ wa wan dem hei jakhlia neitæ sa i khynnia wym yoh thaw de ki bru u lai na ki luti lai kjat iwa da booh hei maa ya kiwa lai wa wan wada hap ki u lai na sarok chirup wa ki kari wa boon, da pynman i yaka wow thoh noh ya ini i sur.
Da pyntip ko leh nadooh wa thoh, i chna sur deilang wa i Music Video ya ini i sur da leh hei por wa tbian wa du 25 sngi donhi.
Hajrong kani ka phang da ong ko wa kamwa datip i waroh wa ka Iawmusiang toh ka yit, ka dur yong ka Ri-loom Jaiñtia waroh kawi. Ka yaw kawa em parom nadooh nachwa heiyatoh i khooid i jngiar. Ha kawa waroh ki khon ka Ri-loom Jaiñtia wanrah ki kat i khon wa yoh hakhmat ka yaw ka syiem wow lidai khnang manda liwon i miet yow yoh u thied khon blooh khon ktung yow pynkmen yaki khon.
Kat u yoo syndet syndet hakini ki kajiak bnai yoo wada kylla loom i jhep i jakhlia ha soodong yong ka yaw ka syiem iwa wanrah i sarom ya waroh hakhmat ka pyrthai.
Hei sakhiat hawa lai i nakhmat ka yaw toh u pait i yaki soh ki pe wa yoohun wa e ka bei rymaw kat u yoo hap u tymmoh wei khmat, u kset wei khmut nawa joor ware i jakhlia wei sma i tung. Da ki hajar tylli ki pharæ wa wan dem ha i jakhlia kiwa ye u wanrah i maa wa khroo ya i chait i khiah kiwa chong chnong lada yoh u psiah wei dem haki baam ki dih yong i.
Kamtæ de kyrpaad ya uwi pa uwi toh u ya pyrkhat lang i yeini i eh wym hoi u sñiaw i wa i du i sngi donhi lai yaw chong yaw i, hei miet da liwan i cha chnong yong i hi. Toh u pynwiar i pyrkhat wa ka chnong Jowai ymtoh ka yong i ieh yn dep cheitu katwa jia ya ka.
Toh u em i itæ i kitkhlieh samen samen yow wanrah biang i khooid i jngiar, i yoosuk yoo kynjai ya ka yit pait yong ka ri Jaiñtia.
Seiwi leh boonsien i pyrkhat i wa ka yaw ka syiem toh ka thaw yadai yathied donhi ym johkhe i u kynmoo wa ha kani ka thaw leh em kiwa chong chnong da ki hajar ngut kiwa riñ mynsien miet wa step yei sma i tung iwa ye u booh hei maa yei chait i khiah.
“Kamtæ neiliang yong nga booh O kani ka kyrpaad wa waroh kiwa wan yaw wow sñiaw i wa ka yaw leh u man ko kam ka chnong yong i hi kawa khooid wow sñiawtre yaka, ym hoi u sñiaw para. U khyrngiat yong bru i u sdang nadooh myntu wa i thaw chong yaw i thaw lai yaw i u man i iwa khooid wa suba, u chim i yei kitkhlieh u pynkhooid pynjngiar yow man ko kam nachwa ka yaw wa em naam em parom heiyatoh wei khooid i jngiar”, pynut ka Lambhadaka.
