Ka yung krehkaam ka District Horticulture Officer, West Jaiñtia Hills ynne ka sngi da pynman ko yaka “Horticulture Exhibition, 2021” ha madan ka Marian Hill Higher Secondary School, Jowai kawa man leh kam ka laad ya ki para warep wow yachem ki, u pynyoo rong yaki mar rep yong ki kiwa bha tam, kamjooh leh yow ya phyllu yumut para warep.
Ka R.K. Blah, District Horticulture Officer hawa e yaki ktien pdiang sñiawbha kamjooh ki kyntien phang pyrdi da ong ko wa ha kani ka sngi ym toh ware wow yadai ya thied wei iwa kyrpang toh wow ya yoh buit wow rep kamtæ toh u chim kabu ya ini.
Ka R. Mylliem Umlong, RO Jowai da pynchlur ko wow pynemkaam yaki jhoor khloo kiwa em chwa cha i kiwa bha leh bar ya kiwa wan na baar deiwa ong leh wa yow lait u sepai ki mar rep yow lait ki nei pyut lada ym yoh wow pynlai yaw ki, toh u chna daki achar, ki jam yowa dai. Kamjooh wow chna da i yong i hi i sboh wei wow rep leh da ki syntu kiwa ye u yah yow dai kamjooh kiwa yoh symbe yow dai iwa daw yarap ya ki warep.
Neiliang u symbood kongsan u D. Pyrbot, District Agriculture Officer, West Jaiñtia Hills da ong u wa hanla ka jylla yong i dang man ko kawa sahdien hawa nujor wa kiwi ki jylla ka ri, neiliang ka sorkar da pynbiang ko yaki Subsidy yow yarap ya ki warep heiwa toh u chim kabu ki warep ya ini, da pynchlur u leh wow thooh yaki jhoor khloo heiwa dang em boon kiwa ym pu tipmit deiwa e nongmuna wa cha ri-loom Garo wa ym emkaam de ki wow thied yaki jhoor wa wan na kiwi ki thaw heiwa da dap ki du da ki jhoor khloo.
Chooh chooh da ong u wa emkaam wow phah Test chwa ya i khyndaw chwa wow rep yow yoh yaka Soil Health Card yow tip kiyi ki jait jhoor wa hoi u rep yow lait u sepai.
Neiliang ka kongsan ka S. Nongbet, Director of Horticulture, Meghalaya da ong ko wa katwon dap dei kmen wow yoh u yachem wa ki warep wei ki warep ka West Jaiñtia Hills toh u man ki kiwa sñiaw sarong neibhah ki da em ki ya u chirmit Lakadong wa da pawnaam ym du hapoh ka ri wot hadooh pyrthai heiwa neiliang ka sorkar leh da sdang ko yaka Lakadong Mission kawa da booh thong 5 snem yow pynku yaki thaw rep naka 2577 Hectare cha ka 6070 Hectare wei i pynmih chirmit naka 16 Ton cha ka 50,000 Metric Ton heiwa katni da yei wow pynheh ya ki thaw rep chyrmit da 400 Hectare.
Da pynchlur ko leh ya ki warep wow rep leh boon ki jhoor yow lait u sepai i khyndaw wei wow chim kabu ya ki yarap naka sorkar.
Ki warep ha kani ka sngi da wan ki deilang wa ki mar rep yong ki na kiwa boon ki thaw tangwa em leh kiwa boon ki wym yoh u wan neidaw wym yoh kari ki wa sangeh kamai ki kari.
