Jowai: U DC ka West Garo Hills u Ram Singh hadien wa pynmih hukum u wow khang yei pynemkaam Plastic nadooh ki klong um, ynne ka sngi da pynmih hukum u wow pynduna yeiwa thied um wa da song ha ki klong Plastic deiwa ong ha ka hukum wa emkaam wow booh ya ki thaw wow yoh um ki paidbah dei mynkna khamtam ha ki sngi yaaw ha Tura wa ha kiwi ki thaw hapoh ka District.
Kamtæ da hukum ya u CEO ka Tura Municipal Board wow chna u ya ki thaw wow yoh ki paidbah wow dih um wei da phah leh ya ki seiñ behyaaw wow kdaw ki ya ki thaw wa khooid wow booh ya kini ki thaw dih um ha ki yaaw ki hat wei ya kiwa pynlai ya ki skur wow leh ki kamjooh.
Da phah leh ya ka tnat PHE waka GHADC Water Works Department wow yakrehlang waka Tura Municipal Board wa ki seiñ behyaaw yow pynbiang ya ki thaw dih um ya ki paidbah.
Ha iwi tawon i liang u DC ka WGH da pynmih u leh sa kawi ka hukum ynne ka sngi pyrchah yei chong dih kiad ki paidbah cha ki thaw uiñke suwari, ki thaw baamdooh, ki thaw pynyieñ kari kiwa da pynwit ya ka chnong ka thaw.
Kamtæ hapoh ka kyndon 144 CrPC da pynmih u ya kani ka hukum wow khang ya ini chong dih kiad, wei kiwa leh pyrchah daw pynchitom ya ki hapoh ka kyndon 110 ka Meghalaya Police Act wei ka kuna u man ko T. 5000 wei kiwa pteiñ u leh pyrchah daw poi ko hadooh T. 15,000 samen.
Discussion about this post