Ka mukotduma PIL wa da yaleh ha High Court ka Meghalaya heiyatoh wa i chna ya u sarok nadooh na Khliehtyrchi cha Treiongriang uwa tip leh kam u Jowai Bypass wa chna da ka PWD (R), Jowai Central Division heiwa i rukom chna da ktah i leh ya ka wah Myntdu, da chong bichaar biang ka ynne ka sngi hadien wa da pyndep ya ka Joint Inspection wa yahkhmat da u Amicus Curiae wa da thung da ka yung bichaar uwa da wanrah leh ya ka bui (Report).
Ha kani ka Report da khana wa ka wah Myntdu kawa mih na Jaiñtia Hills toh kawa kai chadooh Bangladesh wei man ko leh kam ka Blai wa mane da ki bru neidaw wa man ko kam kawa yada wei pyndap um ko ya ka Pynthorneiñ wa Pynthorwah kiwa pyndap pynbiang yeiwa emkaam ki 40,000 ngut ki bru.
Tangwa i chna sarok ha chrooh ka wah toh iwa da yoh bor na ka sorkar iwa da ktah won ya kani ka wah neidaw wa oor wei haap ki khyndaw ki moo wa kiwi cha ka wah Myntdu hadooh wa da dap ktieh ko wei ini da ktah kylla ko ya ka um wa emkaam yow rep kamjooh ka um dih.
Ka yung bichaar hadien wa dadep u puræ ya ka Report da hun ko wa neiliang ka sorkar da leh ko yeiwa emkaam yow khanglaad yei oor moo, oor khyndaw wei da khat ya iwa dadep oor tangwa ini waroh toh iwa chimpor.
Neiliang u Amicus Curiae da ong u wa ha kini ki por tlang wa daw stang ka um, kamtæ da emkaam wow pyntikna wym chah pynthut i kai ka um.
Kamtæ da phah ya ka sorkar wow leh yeini i kreh wa da sdang ko wei ka sorkar leh toh u pynmih hukum ko yow khang yei noh ya iwon iwon iwa mih neiwa chna chapoh ka wah.
Chooh chooh toh u booh leh hadooh katwon jngai na ka wah wow chah u kreh deiwa em ki yurim wa biang.
Kamtæ da phah ya u Amicus Curiae wow e biang u ya ka Report ha u bnai wa ar u snem thymme.
Discussion about this post