Da: U Chandame Sungoh
Ka arsap da man ko kawa joor bha ha kini ki sngi, wei da wara haka ri waka jaitbru yong i.
Kayi ka ka arsap? Eh bha u batai yeini. Nga u thoh O yei yumut i ktien arsap deiwa yoh O na uwi u woh khroo yutang. Ha kawi ka sngi katwa dang chongke i tæ kylli O ya u woh, iyi mut arsap? U thoh O heini kat kam wa batai u ya nga:
Ka arsap toh i rukom man, i rukom pyrkhat pyrdaiñ yong u bru næ ka bru kawa yah wa lam cheiwa sih. I mynsien wa sih wa em i ñiaw chiliang chah chiliang ha uwi deiwi ha uwi deiwi, ha uwi deiwa sih ha uwi deiwa bha. Du nei kyntien arsap leh da sñiawthooh iwa man ar ar, pynjop yabor ya uwa rem, pynrem yabor yow watoh u jop, e ya u wymtoh u yoh tæ pyndooh won ya uwa chong hok u yoh lane klam deiwa bha leh deiwa sih katæ toh ka yumut i arsap.
Iwi na i sih wa ktah bha yei chongsuk chongsaaiñ yei roi yei paar haka imlang sahlang waka ri ka jaitbru yong i toh i arsap haka synchaar khadar. Hawa yaklam i chaphang ka synchaar khadar toh yaka sorkar neibhah ka synchaar khadar toh i kaam i yong ka. Kayi ka ka sorkar? Ka sorkar toh u paidbah. Kitu kiwa mihkhmat nadooh ki MDC ki MLA wa ki MP wa jied i ki wow mihkhmat neibynta yong i, toh ki wow chna ya katæ ka sorkar ka wow synchaar ya i. Deini i rukom, ye u ong wa i synchaar i pyn da i ya i hi. Tæ kiwa kammon won kitæ kiwa mihkhmat ki MDC, MLA, MP wa i jied i?
Pait nongmuna tang na kani ka Election MLA wa dang dep. Ki kyrtong kiwa yieñ yakhun leh kiwa boon hi na-ai ymtoh wa yieñ ki wow yakhun kam ki MLA wow yoh yei jop neibynta u e yei chakri iwa hok wa sakhiat ya ka ri waka jaitbru. Yieñ ki dei deiwa pyrkhat arsap hakhmat ka pyrthai wei da kbai da kyrha ki deiwa ong wa yieñ ki wow yakhun kam ki MLA toh neidaw wa maya sakhiat ki yaka ri waka jaitbru tangwa ha dohnood ha mynsien yong ki tea sia næ wa manda yoh yei jop tæ yoh u pynheh pynkhroo yei kamai kajih yei khih yei khan ya ka spah ka phaw ya ka naam ka burom yong ki hi samen. Neitæ i daw tea ym salia ki u thong daka lak ka klur wow klam pynbiej ya ki bru dei thok dei chukor wow pynjop ya ki, wei manda jop ki tæ man ki kiwa arsap, kiwa leh chiliang chah chiliang kiwa bamtooh kiwa baamsap wei thok wei chukor. Sa i wym biang i tip i stat, i sñiawthooh i chemphang wow wanrah yaki buit ki budia, ki Plan ki Policy wow wanrah yei roi yei paar; wow chna yaki aiñ ki kyndon wow pynkhlan wow wanrah yei chongsuk chong chngaaiñ haka ri ka jaitbru dep tæ ban saka baamtooh baamsap katwa kiwa chong chnong ka ri maad ki pli chiboon i eh i khoo i wym ye de u batai .
Lada pait i ya ki MDC kiwa toh u pait u yoo ya ka riti ka dustur i khyndaw u chyiap leh ym em u leh ki deiwa toh rukom. Kut ki Dorbar ki Session khlem em u yaklam ya ki mat ki yura kiwa yatoh wa kani ka phang. Boon sa du kiwa baam pynngam ya ki wakreh yei kaam. Heiyatoh wow pynneh pynsah yaka riti ka dustur leh iyi iyi wym leh, heiyatoh wei khyndaw u chyiap leh ym ye u leh deiwa toh rukom. Lada paan NOC da ki dkhar, ki palat chnong wa ye u e boon ka poisa u chna Coke Factory u chna karkhana pynmih Cement tæ smat u e. Lada paan Pata paan Land Holding Certificate da ki bru Pnar yong i tæ da ki snem leh ymdep lada ym yoh u pynbaam poisa.
Lada kyruiñ cha ki Syiem ki sordar, ki waheh chnong ki Dolloi leh kamjooh hi. Ki seiñbhalang kiwa toh sap u kreh monsñiawbha pyn da idæ neibynta i bha i miat ka imlang sahlang ka ri ka jaitbru leh da man pathan ki ki seiñ sihlang kiwa emktilang ha ki kaam pyrchah aiñ wa boonjait kam i khayi masi tooh, khayi dieñ tooh, khayi mooyong tooh wa kiwi kiwi ki kaam. Hao, ymtoh sæ waroh ki seiñbhalang wa man kamtæ, tangwa kiwa boon hi na-ai tæ kiwa kamtæ suda hi. Yeitæ, nga ym ong O, ki paidbah hi wa bichaar.
Wot chi yung chi sem leh dang em ka leh arsap , u kurim dang leh arsap yaka kurim, dang khwan dang murieh poisa yow yoh u thied kiad, u leh kusbi leh awria. Ka bei ki khon leh dang khwan dang murieh poisa yow yoh u pynemkaam cheiwi tawon i kaam i wymtoh neibhah ka yung ka sem. Sa ki khon manda heh da khroo dang arsap yaka bei u pa. Ki pli ka bei u pa tæ khih chitom pat-pat, khai-khai cha chnong yow yoh u pynlai skur cha sor ya ki khon, katwa ki khon won tæ dih kiad dih drugs dih bhang dih biri sikret, lai kusbi dakait wa kiwi kiwi ki kaam sñiawbha ki wym em phoida.
Wot ka bei u pa leh dang em kiwa arsap ya ki khon. U pa wa dih kiad, ka bei wa dai kiad ka khusbi, kwah won ya ki khon u man ki kiwa emsalon kiwa tip bru tip Blai. Ini ymtoh mo i tæ i arsap? Lada kwah phi u man ki khon phi kiwa emsalon kiwa tip bru tip Blai tea pynyoo nongmuna chwa da phi sæ ya ki da ki kaam wa bha yong phi. Toh pong kam katæ ka bei chyngktad ran dei dien tæ phah ya ki khon u lai dei phrang.
Sñiawsih chooh chooh wot hei kaam niam kam balang iwa khooid wa kyntang leh dang em i arsap. Chwa u pynkut u khana O kani kawi ka parom. Ymtoh wa beiñ wa pynrem O, u e O ka nongmuna yow sñiawthooh:
Em uwi u tymmenwasan ha kawi ka balang, da tooh syiar u, hachwa u ah doh u ka tæ lai yaseiñ chwa u neibhah watoh ka miet balang wow klam u yaka Subject kawa ong , “Men ym tuh”. Tea kset u ka katæ ka syiar hapoh tharu.
Poi ha yungmane tæ klam stat klam chongchit u waheh ya katæ ka Subject hadooh wa ki bru ha yungmane da paitbiej wei yaroh ki oo. Mar lait yaseiñ ka kurim u liwan ko syndon cha yung tæ pynlait ko ka katæ ka syiar. Utæ u tymmenwasan mar yapoi ha yung looid Coat booh Bible booh kot rwai, thooh tari tæ yow ah ka katæ ka syiar. Manda pait u plak wym em de. Kylli u yaka kurim u cheiwon katæ ka syiar. Ong ko wa da pynlait ko ka. Ong u weileh pynlait pho ka? Khana ko wa sñiaw yaamrem sñiaw sarom ko yeiwa klam u ha yaseiñ tæ pynlait ko. “Phuit, wabeij i doh da em la hayung dang weiñ u pynlait. Klam ka ha yungmane tæ pyndep rukom heh ka sæ, toh pong wa klam O ya i, klam ka ya ki bru sæ”, ong u ru yaka.
Paralok, ha ki rukom waphær waphær boon napyrdi yong i wa man i kam kani ka parom. Na itæ i daw to yn ya khyrngiat yongbru i wow kylla yei pyrkhat pyrdaiñ neiwa sih cheiwa bha. Lym kamtæ daw chah tim i kam wa tim u Jisu ya ki Pharisi Sadusi (Purea Mathaios 23 lynnong ka dkhot wa 1 ter ter).
