Ynne ka sngi ha ka yalang ya phyllu hajrong kammon u yakhun pyrchah yei chah chalan ki khynnah cha baar ri næ cha baar District wei yow lait ki leh nei chah pynemkaam bakla wa da pynman da ka National Commission for Protection of Child Rights chirup i yakrehlang ka State Commission for Protection of Child Rights wa ki bor District ka West Jaiñtia Hills District, ha Conference Hall u DC ha Jowai, da emlang ka seiñ wa pait kyrpang ya ki kynthai khynnah, ki pulit, ki Doctor wa kiwi.
U M.B. Tongper, ADC ka West Jaiñtia Hills District hawa e yumut ong u iwa hakhmat dooh toh u lai pynsñiawthooh cha ki chnong ki thaw neibhah boonsien wot ki khynnah ha ki chnong wa cha kdong leh chah pynbor ki u lai chong kreh yung bru cha sor næ kiwi won ki thaw deiwa dooh yei hok wow puræ puthi, wow im kam ki khynnah, wei ye leh u man lyngba kam kini jooh chah yahbakla ki leh ha kiwi won ki kaam.
Ong haroh u toh u paitsiar bha ya ki khynnah, wei kamjooh ki dorbar chnong toh u thooh bniah ki ya ki khynnah kynthai hawa mih ki na chnong wa cheiwon lai ki wei yi krum ki.
Neitæ hawa lai pynsñiawthooh cha ki chnong wa cha ki skur leh toh u paitbniah bha yei man i long neibhah wa i dooh i duk leh toh kawi na ki daw wa pynman ya ki khynnah u chah chalan wei chah yahbakla.
Hadien wa yoh pynlait ya ki kynthai, ki khynnah nei chah yahbakla, toh u wanrah biang ya ki cha ka imlang sahlang wa bha neibhah emkaam ki yei kyrchaan heiyatoh wa i bor thij i pyrkhat. Wei neiliang ki chnat krehkaam waphær waphær leh toh u yakrehlang ki hajrong ini.
Kyntu haroh u wow pyntip smat smat hawa em kiwon kiwon kiwa wiar, neibhah wa i chalan kynthai khynnah ya sariem i wei chalan drugs na kawi ka thaw cha kiwi won, i daw toh wa em ka poisa.
“Tæ kamwa ki khynnah man ki ka mynried yong ka imlang sahlang, katwa ye wa lah toh u sumaar u e yada ya ki lym kamtæ ym em yumut ka imlang sahlang,” pynrap u M.B.Tongper.
Kiwi won wa e yei klam kynthup ki ya u S. Passah, District Child Protection Officer, West Jaiñtia Hills, ka I. Kharpran, SI Women Police Station Jowai wa u SI J. Majaw kiwa da pynsñiaw ya ki daw waphær waphær wa pynman ya ki khynnah kamjooh ki kynthai u chah yahbakla wei chah chalan neibynta u pynemkaam bakla ya ki ha ki kaam waphær waphær.
Discussion about this post