Ka seiñ kiwa khayi jhoor hapoh ka lama ka Meghalaya Gingers and Fresh Vegetables Association, ynne ka sngi da lai yachem ki wa ka Montri ka chnat i rep i riang ka jylla, ka Ampareen Lyngdoh yow ujor yei eh yong ki khamtam i chah khrong poisa pyrchah aiñ ki kari kit jhoor wa lai chalan cha thaaiñ Assam wa kiwi ki thaw.
Hawa khana yeini ynne ka sngi, uwa yahkhmat ka seiñ, u Bristar Mawthoh da ong u wa da ujor ki cha ka Montri hadien wa i chah pyndik ki kari kit jhoor da pteiñ i hadooh katni wot hadien wa kiwa yahkhmat ka sorkar wa kynthup ya ki Symbood Montri Rangbah kitæ u Sniawbhalang Dhar wa u Prestone Tynsong da pynlait ki nei chah khrong ha ka thaw thawkhia namo ka Weighbridge.
Da khana u wa ka Montri hadien da yoh ko u ap u sñiaw yei eh kiwa khayi jhoor, da pyntikna ko wow khut yalang ki chnat sorkar nadooh ka chnat ka rep ka riang, ka Transport wei kamjooh ki pulit.
Kiwa khayi jhoor da kam ki wa dang hap lai thaw ki ha Weightbridge wei lada tam du 100 kilo, da chah chim ki 1000-2000 tangka.
Da pyntip ki leh wa man-i-por da lai ujor ki cha ki pulit, cha ka sorkar tangwa khlem mankaam iyi iyi wei ki thaw wa chah khrong poisa ya ki kari kit jhoor toh ha ka thaaiñ Khliehtyrchi, Ratacherra wa Umling.
Da pynbaad ki leh wa i khrong pyrchah aiñ teiñ teiñ dapoi cha i kynroi i yachoh wa kiwa yah kari kit jhoor.
Discussion about this post