Ka Village Health Council yong ka chnong Mooshrot, West Jaiñtia Hills District chirup i yakrehlang ka Barato Outpost (OP) wa ka Laskein CHC, ynnin ka sngi da pynman ko i pynsñiawthooh paidbah ha chnong Mooshrot heiyatoh wa i chongkha dang khynnah, ka aiñ POCSO Act, i pynsñiawthooh ya ki jait pynchitom manda tyngkheiñ aiñ wa kamjooh hajrong i emkaam wow e yada ya ki khynnah nei chah pynemkaam bakla wa i chongkha dang khian rta.
U SI Wilfred Jala, Officer In-charge Barato Police Outpost hawa klam ha kani ka sngi da kdaw u yei eh wa mih nei chongkha khynnah, kam i chah ktah i chait i khiah, i puræ puthi, i chah ktah hei heh i san yong i doh i pran wa i bor pyrkhat pyrdaiñ wa kiwi de. Wei ya kam kini lada chem ye ki u chah pynchitom katkam ka aiñ.
Neitæ da klam haroh u hajrong ka aiñ Protection of Children from Sexual Offence (POCSO) Act.
Ka M. Papiah, Counsellor, Adolescent Friendly Health Clinic, Laskein CHC da batai bniah ko hajrong i ktah wa mih nei smat chongkha, deiwa ong leh wa ye u chah ktah wot i rukom heh san i khonboo.
Da ong ko kam ki kynthai i rta wa 9 hadooh 13 snem toh iwa dap dei em boon jait i sñiaw i pyrkhat ya iwon iwon wa takhooh ki, katwa nadooh i rta 15 hadooh 18 snem won da sdang heh krai ki hei bor yong i doh i pran wa i pyrkhat.
Katwa hei rta dang khai khynroo won sdang ki wow sñiawthooh wa da phær ite i sñiaw, da laitlooid i heh i san, kylla i thij i pyrkhat, wei da tip ki leh u jied ya ki lok wa yatoh rta.
Chibynta yow sñiawthooh chooh chooh ki paidbah ha kani ka sngi da em leh i lehke Drama tbian, neitæ da em leh i lehke bol.
Kiwi won wa e i klam ha kani ka sngi kynthup u waheh chnong u Janai Suchiang, ka Chairman VHC, ka B. Lathong, ka Community Gender Health Activist (CGHA) ka Amelia Lyngdoh kawa da kyntu joor leh hajrong i emkaam i yakrehlang nadooh ka chnong ka thaw yow ye yada nei chongkha khynnah dei wow pynchlur haroh u yaleh chwa ki u pynheh pynsan ya idæ.
Discussion about this post