Ynne ka sngi u Deputy Inspector General (DIG) yong ki chipai yada khappood ka ri, ka Border Security Force (BSF) Meghalaya Frontier, u D. Haokip hajrong i kær naar-chieh ya u pood ka India wa Bangladesh ha jylla, da ong u wa kamwa 70% i kær naar-chieh ha khappood ha Meghalaya toh iwa dadep wei kamwa 30% dang sahteiñ i na kiwa boon ki daw.
Heijooh i por da ong u wa i daw wa kongsan dooh wa sahkut i kær naar-chieh toh i wym ye u pynbait ya i thaw.
Da ong u leh wa kiwa boon ki thaw wa ympu ye u kær naar-chieh toh ha East Khasi Hills wa kattu katni ki thaw ha Jaiñtia Hills.
Katkam wa ong u Haokip, i dawa na kiwa chong chnong wow kær naar-chieh nadooh ‘Zero Line’ toh i wym ye wow man neibhah wa em boon ki kyndon kiwa kdoh ya waroh ar tylli ki ri, ka India waka Bangladesh.
Kam wow pynkynmoo heini ka Co-ordination Committee on International Border (CCIB) da pyrchah ko ya ini i kær naar-chieh katkam wa thmu ka sorkar India neibhah wa daw boon ki thaw kiwa daw dooh noh cha ka ri Bangladesh heiwa da maham ko leh wow ujor cha ka Meghalaya High Court hajrong ini i kaam.
Puræ leh: Cha Meghalaya High Court u ujor ka CCIB pyrchah yei e NOC sop-sop ka JHADC
