Ynne ka 17 tarik kawa man ka sngi pynkut ya ka lehniam Behdieñkhlam ki khon ka Raij Tuber, da wan sakhi ya ka da u Symbood Montri Rangbah ka jylla, u Sniawbhalang Dhar kam u kongsan hei emlang u MLA ka thaaiñ u Kyrmen Shylla wa kiwi kiwi de.
Ka Behdieñkhlam ka Raij Tuber toh kawa heh dooh na waroh ki Behdieñkhlam heiwa ki khon ka Raij wan ki da phaw hajar ngut na kylleiñ ka Ri-loom Jaiñtia (East wa West).
Ha Biar Blai, ki khon ka Raij na kylleiñ da wanrah ki ya ki rong ki rot wa da pynriam har rukom.
Ha ki rong ki rot da thoh ya ki kyntien wa kit yumut kam i dooh khih dooh kreh, wow kiar na u drugs, i yada ya ka rymaw, i chah thombor ki khynnah wa ki kynthai, i pyrchah luti rel wa kiwi kiwi wei waroh ki rong wa da wanrah da kynjoh ki 65 tylli wa da pynhiar ha Biar Blai.
Neiliang ka Seiñraij Tuber da e dorkhat ko ha u kongsan wow paan yarap wow chna ya ki thaw chongke ha kani ka thaw wei kamjooh wow mang poisa man-u-snem ya ka lehniam Behdieñkhlam ka Raij Tuber.
U Sniawbhalang hawa e yei klam da e khublei u ya ki khon ka Raij wei da kular u wow yarap neibynta iwa da paan yarap ha ka dorkhat.
Hadien wa da dep noh ya ki rong, da em ka Yaslait Niam hapyrdi ka Phang Wah wa ka Phang Neiñ kawa le wat heiwa ha kani ka yaslait da jop da u waheh na ka Phang Neiñ.
Discussion about this post