Jowai: U President ka MSSASA u Aristotle Rymbai da pyntip u wa ki 12481 ngut kiwa sikai hapoh ki skur Sarva Shiksha Abhiyan hapoh jylla ympu em yoh ki ya ka tulop yong ki la soo bnai kattu, ka Arrear Salary yong ki phra bnai yong u Financial Year 2016-17 ympu em u su ya ka da ka sorkar jylla.
Da ong u wa “Waroh tip ki wa ym em kiwa bien wow man kam kiwa sikai yow man kiwa mahajon, wei ym kwah ki wow man kiwa chah pynchitom neidaw wa jied ki yeini i kreh.”
Chooh chooh da on u wa i wym su ya ka tulop wa soo bnai nadooh u Naitung (April) hadooh u Naiynñiaw (July) 2018 kamjooh leh ka Arrear da booh ko ya kiwa sikai (SSA) hei chitom iwa da pynchrai leh ya ki wei daw ktah i leh ha i stat i tip hapoh ka jylla.
I eh i khoo wa yachem ki 12481 ngut kiwa sikai man i iwa dang joor kat dang mih ki sngi neibhah ym man i iwa suk wow im khlem baam nalor wa kini kiwa sikai emkaam wow pyndap ki sa ya ka bai kari wow poi cha skur.
U Rymbai da ong u leh wa da chakri ki da palat 15 snem kattu wow pynku ya i stat i tip wei da toh i por wa ka sorkar jylla u wanrah ko da ka thong krehkaam wow sñiawthooh wa ymtoh wa suk kiwa sikai wa chitom ki wei ini daw ktah ko ya ka mynried ki khynnah skur.
Discussion about this post