Ka United Democratic Party (UDP), lyngba u Dr. Jemino Mawthoh, Secretary da phah ko ya ka khubor sñiawlem cha kiwa hayung hasem u (L) S.K. Sunn yow pynsñiaw yei sñiawsih wa khroo hajrong i khlaad noh u (L) S.K. Sunn ynnin ka 10 tarik.
Ka UDP da ong ko wa u Sunn da wan u wow pynyabi wa ka UDP ha ka 29-05-18 kam u Associate Member yong ka Party wei i wan psiah yong oo da e mynsien ko chiboon ya kiwa yahkhmat wa kiwa kyrchaan ya ka Party UDP wei neiliang ka Party da yooluti ki chiboon wa man u u bru wa stat, uwa kreh chitom wa uwa smat wow yarap ya kiwa kup chilliang sem chilliang.
Ki paidbah leh da sakhi ki yei stat wa i chemphang i yong oo wow yatai ya ki phang kiwa boon kiwa yatoh wa ka jaitbru wa ka jylla hi waroh kawi, kamtæ i khlaad noh u man ko i dooh nong wa khroo ym du ya ka yung ka sem tangwa ya ka Party UDP, ka Constituency wa ka jylla hi waroh kawi.
Ka UDP u kynmoo yanom ko ya ki kaam kiwa bha wa uni u rangbah da noh sñiawbha u ha ka saaiñ pyrthai wa ka imlang sahlang.
“I phah i ya kani ka sñiawlem neiliang ka Party UDP ya phi ka kurim, ki khon ki kti wa kiwa hayung hasem waroh wei i booh i yei duwai ha u Blai Tre Kynrad uwa booh wa thaw wow kner u ya ki kti pyntngen wei wow emlang u wa phi kam ka yung ka sem ha kam kini ki por wa sñiawsih wa da kah u lyoh wa doom. To u Blai i suk u ya emlang u wa phi wa ka yung ka sem waroh kawi ha ki sngi ki por wa daw wan. Lai suk, Bahdeng Sunn, u Blai u emlang u wa i mynsien yong phi.”
