Ka seiñ WJSU da lai pait ko yei pynchna ya ka madan Synthetic Football Turf wa em ha Ladjaplem, Amlarem heiwa da chem ko wym yahaap i kreh wa ka poisa wa da booh yow pynlut u chna ya kani ka madan da kawa miat wa bha wa yahaap kyrdan wa kiwi.
Da chem wa u dooid wa em soodong ka madan uwa da booh dor Rs. 34,21,000 yow chna toh uwa da chna dei wym em miat wei ym yahaap wa ka mang tyngka.
Hawa pait wei yaklam wa u Contractor, ka seiñ da chem ko wa ki mar wa da pynemkaam yow chna ya uni u dooid toh i wym poi tang 25% neiwa toh u pynlut, kamtæ da kyntu ya ka Directorate of Sports and Youth Affairs wow wan ki yow pait dei khmat yei rukom chna wei wow pynbait yeini yow ya ryngkat wa ki kyndon wa da booh ka FIFA.
Heiyatoh won wa i kær jaar (Iron Chain-link Fencing) kawa da leh hei lut wa Rs. 57,65,000. Da chem wa kani leh toh ka wym ye u pdiang da ki paaid ka War Jaiñtia heiwa da man ko du kam ka jaar kær trep syiar wei ym yahaap wow man kam ka wow em cha ka thaw yalehke ki bru. Ini da man ko leh kam wow yoobeiñ ya kiwa yalehke kamjooh kiwa wan pait-ke kiwa emkaam leh wow chynna dei mait ya ka madan wei da toh leh wow tympra noh ka wei wow chna da kawa yahaap wa kiwi ki Stadium wa em ha India wa hapoh ka pyrthai.
Ka seiñ da ong ko wa lada ym leh yeini daw ye u poi cha u pood wow chimkti kiwa chong chnong wow leh ki dei kaam.
Hajrong ki kaam wa ong wow pynchna pynmiat namo ki “Repair And Renovation Works”, ym em yoo iyi iyi leh wa da leh heiwa neibynta ini da booh ka poisa kawa Rs. 52,35,000.
Ka seiñ da ong ko wa da yoo pathan wa em i kreh yow chna ya ka Gallery kawa heithaw u em hajrong yow chynna ya ka madan da em pathan chapoh wa ka Level ka madan wei yeini leh toh wow pynbait noh wei toh u pynche leh.
Heiyatoh won wa i siang ya u Artificial Turf da chem wa da chongdor Rs. 4,82,92,000 tangwa ka seiñ da ong ko wa da u Synthetic Turf wa da mynjur da ka FIFA deilang i bai chna wei wow booh dooid ymtoh u poi ko palat Rs. 1,85,00,000 wei ini pynyoo ko em i joor i pynsyad dor wei pynemkaam bakla ya ka poisa.
Kamtæ ka Sports and Youth Sub-Committee ka seiñ da dawa ko wow wan tuklar da ka Director ka Directorate of Sports and Youth Affairs yow pynbait yeini i chna tangdep.
U booh RTI leh ka seiñ yow chemdien chooh chooh ya ka Work Order deilang ki Estimate wei lada ym ye u pynbait yeini daw lai ujor cha u Controller and Auditor General (CAG), cha ka Lokayukta wot chadooh ka High Court, pynkut ka khubor na u Gabriel Shylla, Publicity Secretary, WJSU.
Discussion about this post