Kamwa leh ha waroh ka pyrthai, ynne ka sngi ka yung krehkaam ka Animal Husbandry and Veterinary Department Directorate of Dairy Development da lehwarom ko ya ka World Milk Day namo ka sngi i dud ha Conference Hall ka chnat ha Mynthong Jowai.
Ha kani ka sngi u WK Kharbuli, u ADC ka West Jaiñtia Hills da man u kam u kongsan, heiwa da emlang ki sahep na ka chnat, ki khynnah skur wa kiwi kiwi.
Ka Dr. E. Passah hawa e yei klam, da pyntip ko ya kani ka sngi da lehkmen katkam i yahkhmat ka FAO heiwa ka India da man ko kawa nyngkong dooh ha ka pyrthai wow mynmih ya i dud. Da khana ko wa i dud man iwa emkaam bha ym du ya ki khynnah tangwa ya kiwa da heh wa ki tymmen wei khamtam ya ki kynthai neibhah i dud yarap i wow yada na iwon iwon i jait kjut.
Neiliang ka M. Shylla kawa man ka Dairy Officer (Quality Control) RDEC Jowai Dairy Plant da pyntip ko wa ka World Milk Day da lehwarom ya ka ha ka 1 Naiynru wei ya ini da rai da ka WHO lyngba ka Food and Agriculture Organisation ha u snem 2001.
Da e ko leh yei batai hajrong i emkaam wa i myntoi wa yoh ki bru hawa pynemkaam ya i dud wei kamjooh ki jait dud wa ye u yoh katni. Deiwa kyntu ya ki bru wow dih chi klat i dud chi sngi neibhah wa man iwa myntoi bha ya waroh ki bru.
U kongsang ha kani ka sngi, u WK Kharbuli hawa e i klam da baitai u wa ka phang yong kani ka sngi kawa ong “Sustainability in the dairy sector along with empowering the environment, nutrition, and socio-economic” namo wow pynneh ya i kaam pynmih dud deiwa yada ya ka rymaw khnang wow pyndap yeiwa emkaam ha i doh i pran ki bru wa ka khayi pateiñ.
Da kyntu u leh yei krehlang kiwa psan masi wa ki sahep wa kiwa kreh ka chnat khnang wow pynku ya i yoh i laa yong ki.
Ha kani ka sngi da yoh leh i klam na u B, Dkhar, Senior Dairy Officer, uwa e i kyntien pdiang burom, u Dr. GL Niang u Sub Divisional AH & Veterinary Officer, Amlarem, u EC Pyngrope, Dairy Officer (Extension) uwa da e ya ki kyntien khublei.
