Hadien wa mih i awri ha ri Bangladesh, da mih ki Video wa pynyoo ya ki nong Hindu kiwa kwah wow yut na kani ka ri chapoh India iwa da wanrah yei chong syir ya ki paidbah ha khappood.
Heiyatoh wa ini, ynne ka sngi neiliang ka FKJGP-Jaiñtia Hills Zone chirup wa ka Synjuk Ki Waheh Chnong War Jaiñtia da hiar ki cha khappood ha Dawki heiwa nyngkong da yachem chwa ki wa u OC ka Dawki Police Station wow kyntu wow pynjoor ya i sonteri ha khappood deiwa krehlang wa ki bor ki chnong.
Hadien ini da lai pait ki ya ki thaw chong sonteri ki BSF nadooh na Riahjalong hadooh Amdoh heiwa da chem wa duna i em ki chipai BSF kiwa toh u yang ha khappood wei da chem wa em ki thaw rieh yong ki leh man kiwa thylli.
Da chem leh wa em ki nong Bangladesh kiwa chna yung ha khappood harood u moo pood kini ki ar ri.
Neiliang u President ka Synjuk Waheh Chnong, u Twinson Rymbui wa u General Secretary yong ka, u Kampher Pohlong da sñiawkhia ki wow chem wa duna ki chipai BSF khamtam kam ha ini i por wa em awri ha Bangladesh iwa pynbor ya ki kattu katni ki khian paaid wow pyrchang yut ki cha India.
Da kyntu ki leh ya ki bor sorkar wa ki bor District wow chimkhia yeini neibhah wa ye u wan psiah ki nong Bangladesh ha iwon iwon i por cha ki chnong khappood iwa ye u ktah leh ya i chongsuk.
Neiliang u Damien War uwa man kam u President ka FKJGP West Jaiñtia Hills da ong u wa hadien wa wan sylli ya ki khappood da chem wa i wym em kær naar chieh ha khappood pynsuk i ya ki nong Bangladesh wow psiah tooh chapoh ka ri khamtam katni wa em i awri ha katai ka ri.
Discussion about this post