Ki heh niam waphær waphær ka chnong Jowai nadooh ki yong ka Niamtre, Unitarian wa ki Hindu da e khublei Christmas ki ya ki khon Christan ka chnong.
Neiliang u Dolloi ka Elaka Jowai, u Puramon Kynjin da e khublei u deiwa booh yei kyntu wow ya ngooh Blai lang i ha kam kini ki por wa da yoo hapoh ka pyrthai katni em chiboon i eh i khoo, i khia i chon, i tynjooh nadooh i kajia i umsnaam, kamtæ ngait u wa dei ngooh Blai ha kani ka por Christmas yow wanrah yei che wei kmen kamwa yoh ha ka yung ka sem, ka Raij u yoh leh yei kmen ha waroh kawi ka pyrthai.
Neiliang u Soumitra Chakravarty, President ka Sarbajanin Durga Puja Committee, Jowai leh da e khublei Christmas u cha waroh ki payu para ym du kiwa ha Jowai tangwa waroh hapoh pyrthai kiwa lehkmen Christmas kawa man ka por yow wanrah yei suk i che wei kam ki khon ka Hindu wa em ha Jowai da e khublei ki leh yow yoh ya u snem thymme wa suk wa kmen.
Da phah u ya khubor wa heini i lehkmen toh u kynmoo u syndong u yada ya ka rymaw yow yoh leh ka juk wow wan wow lehkmen ki kamwa da yoh waroh chi kattu.
Neiliang won u Rev. Sowat Laloo, Minister I/c ka Balang Unitarian Jowai da ong u wa kam kiwa chong chnong ka jylla toh u em i yei ya sñiawthooh yumut kiwa burom kylliang uwi ya uwi, wei deiwa leh kamtæ daw man ka chnong ka thaw kawa chongsuk chongkmen neibhah kamwa man katni ha ki jylla ka North East da em ka awri awra wot hawa yatoh wa ka niam.
Kamtæ da ong u wa i wan ka Christmas pynmoo ko ya i wa wow em ka mynsien wow maap kylliang deilang ka mynsien burom kylliang kamjooh ka mynsien wow yarap ha ka imlang sahlang wei deiwa em ka chongsuk daw wanrah ko leh ya ka roi ka paar ha ka jylla yong i waroh kawi.
Discussion about this post