Ynne ka sngi da lehwarom ya ka World Blood Donors Day ha Jowai hajrong ka phang ‘A Drop of Blood can Save a Life’ heiwa da yahkhmat leh wow chim ya ki kyntien kular da ka Additional Deputy Commissioner, ka DD Syngai chirup wa u MA Challam, Extra Assistant Commissioner, Jowai, heiwa da emlang ka Dr. P. Shylla, In-charge Jowai Civil Hospital Blood Centre wei ya ini i jooh leh da chimbynta da kiwa kreh ka yung krehkaam u DC wow chim ya ki kyntien kular ha Conference Room u Deputy Commissioner Office, Jowai.
Kam chibynta yong ka World Blood Donors Day da pynman leh ya i pynsñiawthooh wa i e snaam sñiawbha da ka Khynroo Khyllood Committee ka Kur Sookpoh Khad-Ar Wyrnai, Jowai chirup wa ka Jowai Civil Hospital Blood Centre, Jowai ha Jowai Civil Hospital Blood Center.
Ka Dr. Rita Pohrmen, Medical Superintendent District Civil Hospital Ialong, da e khublei ko ya kiwa wan e snaam sñiawbha neibhah da i snaam daw ye u pynim ya ki bru wei da ban joor ko yei emkaam u e snaam langær khnang wa ym duna i snaam ha ka Center.
Ka Dr. P. Shylla, da pynsñiawthooh ko hajrong kiwon wei kammon wow e snaam wei kammon yarap i ya kiwi ki bru kiwa em hapyrdi i kjut chitom.
Da khana ko wa kiwon kiwon kiwa chait wa khiah kiwa em 18-60 snem kiwa khia ym duna ya 45 kilo wei kiwa em ya ka Hemoglobin Level wa ym duna 12.5 ye ki wow e snaam heiwa ki chynrang ye ki wow e snaam 3 bnai hadien wa dep e snaam katwa ki kynthai won hadien 4 bnai.
Kiwi kiwa da klam ha kani ka sngi toh u L. Paswet, Ex Secretary Khynroo Khyllood Committee, Kur Sookpoh Khad-Ar Wyrnai, u R. Syngkon, General Secretary, Kynroo Khyllood Committee, Kur Sookpoh Khad-Ar Wyrnai, Jowai wa u B. Shylla, President West Jaiñtia Adventure Cycling Association, Jowai.
