Da: U Chandame Sungoh
Hadien wa da mih i awri awra wei chah pynbaad leh thok hei jied ya ka Ticket First Prize ka Lucky Draw wa da pynlai da ka Chi Iung Multipurpose Society wa man da ka Dumper Truck heiwa kini ki dkhot ka Society da ong ki leh wa bien hi ki wow e da ka poisa soophaw lak tangka katkam i dor kani ka Dumper Truck wei yeini da pynche leh hi da ki bru yong ka Chi Iung ha ki laad pathai khubor waphær waphær ha Shillong Press Club. Nga won kam u bru paidbah uwa jooh thoh namo uwa jooh klam da boonsien ha ki khubor heiyatoh wei sñiaw wei yumut yong nga neibynta ka imlang sahlang ka ri waka jaitbru, ym toh dang ini namo dang ha kani i kaam ki Chi Iung wa thoh namo wa klam O, lada pait lada thooh phi ha Google yei pyrtuid O tæ ye phi u chem yeiwa dep thoh yeiwa dadep klam O.
Heini i por leh kwah O u pachaad yumut kajiak heiyatoh wa kani ka kaam. Ym beiñ ym kynnoh wei ym ong O yeiwa toh yeiwa lait yei pynche ki Chi Iung ha ki laad pathai khubor yeiwa emkti næ ym emkti ki ha cha lyndet ini i kaam thok neibhah khlem tip yei sakhiat u pynbaad biej khlem tip tikna yei daw leh man iwa pyrchah aiñ. Wei kammon hi u tip yei sakhiat khlem da kylli da takit da ki bor yong ka aiñ namo da ka Investigation. I pynche hi-eh ha ki laad pathai khubor tæ iwa ye u pynchong ñia katwa ngait. Han lada em mynkna itæ i suba ha mynsien leh u pynyoo pyrthai won leh wym man. Iwi donhi kwah u ong wa i kitkhlieh tæ toh ka yong ki kam kiwa pynlai hi se.
Yaroh hi O ya ki Chi Iung wa da e kti ki cha ki pulit katkam wa da klam ki ha khubor tangwa hadien wa da tip ki ya kitu ki bru kiwa emkti heitu i kaam won kattu kammon u leh. Ymtoh mo kut hi-eh du hei ya maap (Compromise) ha Police Station wei pynche ha ki laad pathai khubor.
Hao para bru, paradoh parasnaam emkaam hi u ya maap, tangwa u thok won ya ki hajar hajar ki paidbah da ki lak da ki klur tæ kut du hei paanmap ha thanat wei pynche ha ki laad pathai khubor tæ ka imlang ye hi ko mo u pdiang?
Hei ong won ki u pynkhle biang leh ym man de ko iwa khooid wa suba neibhah da boon kiwa dadep noh ya ki Ticket yong ki, wei kammon u leh ki ya kitu ki hajar hajar ki paidbah kiwa dadep noh Ticket? Lada pynkhle tæ ymtoh mo da man hi i thok i chukor?
Kattæ katu ka Dumper ym toh de ka yong ki Chi Iung, ym em hok de ki ka u kamtre ka, da man ka yong ki paidbah, ki paidbah dadep thied lang ki deiwa pynlut nadooh chispah, sanspah, chi hajar ter ter. Katda kamtæ, hei sñiaw yong nga bha wa e noh ki ka cha u paidbah deiwa e kti chwa ha u Deputy Commissioner yong ka West Jaiñtia Hills District. U DC won u khut noh u da ka Public Hearing namo ka pynsñiaw paidbah, ki paidbah won yoh ki u pynsñiaw yei sur yong ki wei u DC won yoh noh u chim rai wow leh yei kaam kamwa kwah wa thrang ki paidbah. Lada toh u e yarap cha kiwa dooh wa duk leh yoh u e, lada toh u e yarap cha ki thaw ri khonswet leh yoh u dai ka katu ka Dumper tea yoh u e. Lada e tang san lak ha kawi ka thaw ri khonswet leh dang man i kyrkhu iwa khroo bha ya ki. Ngait O leh jan kitu kiwa thied Ticket leh kitu hi kiwa thied dei burom akor dei tipbru tip Blai tea ym sñiawsih sniawphær ki lada leh kamtæ.
Ini i thoh O ym em u mut O u yaleh pyrchah wa ki Chi Iung, neibhah lada mut O u yaleh pyrchah tæ da e O da ka ujor kawa khor cha ki bor ka aiñ namo wot cha ka Meghalaya High Court leh. Kwah O u e yumut ya ki Chi Iung wa ya ki paidbah hi leh kamjooh yoh u poi chei bhalang khlem da beiñ da pynbaad ya kiwon kiwon.
Discussion about this post