Ka AJYWO Central Body chirup waka AJYWO-East Jaiñtia Zone ynnin ka sngi, hapoh i yahkhmat yong u President ka AJYWO East Jaintia Zone, u Heatermoon Ryngkhlem wa u Secretary General ka AJYWO Seinbei, u R. Siangshai lyngba ka yung krehkaam yong u Deputy Commissioner, East Jaiñtia Hills District da lai li phah dorkhat ki cha u Montri Rangbah ka jylla, u Conrad K. Sangma wow pyrchah joor hajrong i thmu yong ka sorkar wow wanrah yabor ya ka luti rel ha East Jaintia Hills District. Ya katai ka dorkhat da e Copy haroh cha ki ar ngut kiwa mihkhmat paibdbah yong ka ka District, kitæ u Kyrmen Shylla, Montri ka sorkar MDA-II wa cha ka Santa Mary Shylla, MLA.
“Kamwa man lang wa kiwi ki seiñbhalang, ki khon yong ka District wa ki paidbah yong ka Bri U Ynñiaw Trep Ynñiaw Wasa, ka AJYWO leh da iwi donhi i sur pyrchah joor ko yei thmu yong sorkar jylla wow wanrah luti rel ha ka District, hajrong ka yurim wym pu em ki aiñ wa khlanbor kam ka ILP wow yada ya ka ri wa ka jaitbru khiañ paaid yong i kamwa da yoh lang kiwi tawon ki jylla ha ka thaaiñ chaneiñ mihsngi yong ka ri India. Neibhah ya ka ILP, ka sorkar jylla da chim rai ko ha Assembly nadooh u snem 2019 wow pynkrehkaam ya ka hapoh ka jylla, tangwa hadooh kattæ leh dang mylliñ ka sorkar jylla waka sorkar pyrdi yeitai i dawa wa emkaam bha,” ong u Heatermoon Ryngkhlem, President, AJYWO-East Jaiñtia Zone.
“Ka Meghalaya toh ka kawi na kawa khian dooh ka jylla ha ri India, ka chnong tre yong ki tre ri tre muluk wa khian paaid wei kawa dang sahdien tam ha waroh ki liang katwa man leh wei em ko hei maa wa khroo bha nei chah tlep ha kiwi tawon ki jaitbru heh paaid yong ka ri thor India kiwa psiah wa mih wa chnong wa sah wei kiwa kamai kajih katwa ngait wa mon hi-eh khlem em ka aiñ kawa khor bha wow khang yeini iwa da ktah wei booh sakhiat hei maa iwa khroo bha ya ka ri wa ka jaitbru khiañ paaid yong i”, pynrap biang u Ryngkhlem.
Da ong haroh u wa ymye u len wa katkam wa man kattæ, ka jaitbru yong i em ko ha kyndian synrang, wei kani ka pateiñ kawa kattæ toh ka pateiñ kawa khaddooh dooh, wei dang ye hi ko mo wow thooh laad thooh luti kamon wow yada ya ka ri wa ka jaitbru yong i, lait na kani ka pateiñ, tharai ym em hi dæ. Kamtæ lada ym kreh i kattæ hiwot neibynta ka jaitbru yong i, yi won wow kreh neibynta yong i, wei mynnu? Ka chongsuk chongsaiñ wa i im laitlooid yong ka ri wa ka jaitbru yong i toh iwa emkaam tam hadooh kattæ kattæ bar yeitæ i roi i paar i wow booh da ka wait syndon ha ka rdang yong i.
U Heathermoon da ong haroh u wa ka East Jaiñtia Hills District toh ka District kawa khian bha, kawa em 1,22,939 ngut donhi kiwa chong chnong tre chnong katkam ka 2011 Census. Lyngba yong ki sarok hi-eh da yoo i hadooh katwon chah tlep ka jaitbru yong i ha waroh ki liang, kawa da ktah sakhiat hadooh kattæ kattæ yei kreh yei khih, yei kamai yei kajih, yei yoh yei laa, i boon bru wei yei chongsuk chongsaaiñ wei i im laitlood yong ki tre chnong ka District, katwa kamtæ, sa katwon tam kwah i wow jæd u pra ka District waka jaitbru yong i lada wan sa katæ ka luti rel.
Katwa u Secretary General won yong ka AJWYO seiñbei, u R. Siangshai da ong u, “Lada katai ka luti rel u wan ko ha ka District, kani daw pynsuk chooh chooh ko ya ki bru heh paaid na ri thor India wow wan mih wow chong wow sah, wow thooh khih thooh khan, wow kamai kajih ha ka District, iwa daw ktah chooh chooh yei hok yoh khih yoh kreh yong ki tre ri, khamtam kitu kiwa em Truck wa kitu waroh kiwa im ja-kpoh deiwa kamai Truck, wei ini daw ktah haroh ko ya ki mar rep mar riang wa pynmih da ki tre ri tre muluk, neibhah ki mar rep baar jylla daw wan kit ya ki da katai ka luti rel cha ka District na ki jylla wa marjan.
“Kamtæ hajrong yong kitai ki yurim waroh, ka AJYWO phah ko ya ka kyrwoh kawa che kdar cha ka sorkar wa lada man katwa man leh ym ye u pdiang ya ka luti rel ha ka District katkam wa man kattæ. Heithaw ka luti rel, ka seiñ e buit ko cha ka sorkar jylla wow pynlai yumut heiwa u yaleh u wanrah ya kiwi tawon ki kaam pynroi pynpaar wa emkaam jhan bha ha ka District kam i pynbha ya ki thaw e sumaar, i wanrah ya ka Government Secondary wa Higher Secondary School waka Government College, i wanrah ya ka District Library cum Auditorium, u chna ya ki sarok wow pynyabi wa ki thaiñ palatsor, u pynchna ya u sarok NH-6 uwa da jæd bha phrai kattæ wei wow yaleh wow wanrah ya u sarok Four Lane nadooh Damsite, Ri-Bhoi hadooh Malidor, East Jaiñtia Hills wa kiwi tawon ki kaam pynroi pynpaar wa emkaam jhaan bha ha ka District.
Discussion about this post