Ynne ka ngi ka seiñ HYC da thoh ko cha u Montri Rangbah ka jylla, u Conrad Sangma wow dawa pyndam noh ya ka aiñ Meghalaya Regulation of Gaming Act, 2021.
Ka seiñ da ong ko wa ka jylla wot hapyrdi wa em ko ha i chitom nei wan ka kjut khlam COVID-19 da pynbna ko ya ka Meghalaya Regulation of Gaming Ordinance, 2021 deiwa kylli ya i daw wa jhan wow pynkrehkaam ya i yakhle hapoh jylla wei katni da pynman aiñ pura ya ka kam ka Meghalaya Regulation of Gaming Act, 2021.
Iwa pynkhyrngiat chooh chooh toh wa neiyi i daw wa da wanrah ka sorkar næ pynbna ko ya ka Meghalaya Regulation of Gaming Rules, 2021 ha ka 21 Kmaichonglad 2021, itæ du soo sngi chwa ka Christmas wei ya i daw wa leh yeini toh du ka sorkar wa ye u batai, da ong ka seiñ.
Katkam wa jubab u James Sangma ha yung dorbar chna aiñ, da pyntip wa dadep e 3 tylli ki License wa chipor cha ki bru samen næ ki karkhana (Company) wei ka sorkar dadep thung ko ya u Chairman wa ki dkhot ka Gaming Commission.
Hadien ini u Conrad Sangma da pyntip u ha yung dorbar wa ka sorkar nadoooh u Naisan, 2022 da pynsangeh noh ko ya ki kaam wa yatoh wa i yakhle hadien wa da mih i pyrchah na kiwa boon wei ki License kiwa da e u kut noh ki ha uni u bnai.
Ka seiñ da ong ko leh wa ini i klam u Conrad Sangma ym sñiaw yahap katkam ka jubab RTI na u Commissioner of Taxes lyngba ka chithi No.CTA-26/2009/Pt-VI/58 Dated Shillong, the 17th August, 2022 neibhah ha ka jubab da klam che wa ka chnat dang lai ko chaphrang wow pait wow bichaar ya kiwa paan (Applicants) neibynta ki kaam yakhle katkam ka aiñ wa ki kyndon krehkaam (Act and Rules). Iwa mut wa hadooh u Naisaphra 2022 ka chnat dang bichaar ko ya ki. Hawa kamtæ yeiyi u ngait, ya u Conrad Sangma namo ka yung krehkaam u Commissioner Taxes?
I klam u Conrad wa ka sorkar wa ym chah ya ki tre jylla wow lai psiah cha kini ki thaw yakhe man ko iwa pyndep rukom neibhah ha ka Rule 18(b)(x) da thoh donhi wa toh i kaamram kiwa pynlai ya kini ki thaw wow booh “Notice” wa ong wa daw chah du ya ki bru na baar jylla wow wan yakhle.
Ka seiñ da ong ko leh wa ym du ki thaw yakhle daw chah lyngba kani ka aiñ tangwa i ktah daw wan i leh lyngba ki yakhle Online neibhah ym em kyndon wow pyntikna wa ki khynnah ym yoh ki wow yakhle Online. Ka Rules da kdaw wei ong ko wa toh i kaamram kiwa pynlai wow pyntikna wa ki bru wa chimbynta toh kiwa 18 snem tam iwa mut wa ki khon khynroo ka jylla leh daw ngat ki ha ki kaam yakhle wei ini daw wanrah i yei eh wa khroo bha ya ka imlang sahlang.
Heijooh i por da ong ko wa i klam u Conrad wa ki tre jylla ym yoh ki wow chimbynta ha ki kaam yakhle leh ym che i neibhah ha ka Act wa ka Rules, em leh ka kyndon wow chah ya ki seiñ ki bru samen wow pynlai ya ki yakhle ha ki chnong ki thaw yong ki. Iwa ka seiñ kwah ko wow tip na u Conrad Sangma wa u James Sangma, hawa kam kini ki thaw yakhle ha ki chnong ki thaw, daw wan yakhle da kiwa wan uiñke suwari (Tourist) na baar jylla wa na baar ri? Namo u yakhle da ki bru na kini ki chnong wa kiwa marjan? Lada kamtæ ym khia i kyntien wow ong wa ym chah ya ki tre jylla wow wan cha kini ki thaw.
Da kdaw leh wa u Conrad ha u Naisan uni u snem da ong u wa ki kaam yakhle daw wanrah ko T. 8-10 klur ka dan chi snem katwa ha ka 18 tarik uni u bnai won da ong u wa daw yoh dan T. 500-600 klur chi snem.
Ka seiñ da dawa ko wow tynyap noh ya kani ka aiñ, wow pyndam noh ya u Chairman wa ki dkhot ka Gaming Commission, khnang wa ym sepai ka poisa ki paidbah wow su tulop ya ki dkhot kani ka Commission wei kamjooh leh wow pyndam noh ya ki 3 tylli ki License wa da e ka sorkar.
Puræ leh: Ym pyndam ya ka aiñ yakhle tangwa ym booh ya ki Casino: Conrad
