I pynkhreh ya ka 4th Meghalaya Games 2022 wa daw pynman da ka Meghalaya State Olympic Association deilang waka Directorate of Sports and Youth Affairs da man ko kawa lai chait chait nadooh ki thaw wow pynman yaki yakob kamjooh i pynkhreh kiwa daw wan chimbynta ha kani ka lympung wa heh ka jylla.
Iwa boon i pynkhreh da pynman ha ka madan wa em ha Polo heiwa daw wai ya kani ka lympung heipor 10:00 waje i step ka 3 tarik uni u bnai da u Montri Rangbah ka jylla, u Conrad K Sangma kam u kongsan wa u Sports & Youth Affairs Minister, u Banteidor Lyngdoh kam u symbood kongsan.
Daw em leh ki kattu katni ki yakob kiwa hap wow sdang nadooh ka 2 tarik chwa wow wai ya kani ka lympung. Ki paidbah wa kwah u wan paitke ym hap ki wow su wei da khut sñiawbha ya ki wow wan ki u pynyoo yei kyrchaan wei wow e mynsien ya kiwa yalehke.
Ka yalang pynhiar pyrda won daw pynman ha Sports Authority of India (SAI) Indoor Stadium haka 6 tarik heiwa daw em 2,600 tam kiwa chimynta.
Ki jait yalehke ha uni u snem da pynboon na 14 cha 19 tylli kiwa kynthup lang ya ki 14 kiwa da pynman ha u 2020 kitæ ka Archery, Athletics, Karate, Table Tennis, Badminton, Basketball, Billiards & Snooker, Tennis, Boxing, Judo, Taekwondo, Shooting, Swimming wa Wushu.
Ha uni u snem kiwa thymme toh ka Football, Gymnastics, Weightlifting, Golf wa Cycling.
Neidaw won wa dang pynchna ya ka JN Sports Complex, Polo kam chibynta wow pynman ya ka 39th National Games, kiwi ki thaw da hap ki wow pynkhreh yow pynman ya kani ka Meghalaya Games 2022 kawa jop.
Ka SSA Stadium kawa em ha First Ground, Polo daw pynman ya ka yalang wai donhi katwa ki yakob daw pynman ha kiwi ki thaw.
Ka Sports Authority of India (SAI) Centre ha NEHU daw man ko kawa boonkaam dooh kawa daw pdiang ya ki 7 tylli ki yalehke kitæ ka Archery, Athletics, Men’s Football, Gymnastics, Weightlifting, Karate wa Table Tennis.
Ya ka Badminton daw pynman ha NEHU Indoor Hall. Ha NEIGRIHMS daw pynman ya ka Basketball, ha Mawlai Mawroh Indoor Hall daw pynman ya ka Boxing, katwa ha Mawlai Madan Heh daw pynman ya ka yalehbol ki kynthai hadooh ka Semifinal katwa ka Final daw pynman ha SAI Centre kawa em ya ka madan yalehbol.
Ka yalehke Golf daw pynman ha Shillong Golf Course. Ka Cycling kiwa waroh ar wa kynthup ya Cross Country wa Downhill Race daw pynman ha Malki, heiwa ka Shillong Club daw pynman ko ya ka Tennis deilang waka Billiards & Snooker.
Ha Laban SC Indoor Stadium daw pynman ya ka Judo wa Taekwondo katwa ya ka Wushu daw pynman ha Madanrting Indoor Hall. Ka Shooting daw pynman ha Assam Regimental Centre katwa ka yimpa ha Crinoline Swimming Pool.
