Uwa yahkhmat ka KSU seiñbei, u Rueben Najiar da ong u wa i kem khlem yurim ya ki dkhot ka seiñ ym mut wow wanrah yei chongsuk chongsaaiñ tangwa iwa nang e mynsien ya ki khynroo.
Hawa klam hadien wa da mih nei yaklam wa ki bor aiñ ha Sohra Police Station ynne ka sngi, u Rueben da ong u wa lada ki pulit dang kem ya ki dkhot du neidaw wa suba, ka seiñ daw mih ko da iwi i sur ha waroh ki District ha ka ri Khasi-Jaiñtia.
Da ong u wa ka seiñ daw lai pynlait jamin noh ko ya ar ngut ki dkhot kiwa chah kem wei da kylli u leh wa ileh hawa chah kem da ki Khasi, ki pulit khana pyrtuid wot ki wut-wut katwa hawa kem ya kiwi ki jaitbru da murieh ki yei pyrtuid.
Da ong u leh wa ka aiñ ymtoh u noh chilliang ko ya uwon uwon wei lada ka chnat pulit dang pteiñ ko wow leh kamni, ka seiñ ym yaklam de ko tangwa u chim da kawi won ka luti.
Neiliang won u Ribok Diengdoh, President ka KSU South Khasi Hills, da ong u wa ki dkhot ka KSU ymtoh kiwa pynyap bru wei lada chah pynbor ym yohsa wow leh da kawi ka luti. Wei da ong u leh wa ki paidbah ymtoh u kyrchaan ki du hawa chah pynyap ki Khasi tangwa toh u kyrchaan ya kiwa im leh.
Discussion about this post