Ka KSU West Jaiñtia Hills District Unit da pynsñiaw ko yei wym ye u pdiang hajrong i kamtre u Montri Rangbah ka jylla Assam, u Himanta Biswa Sarma ya ka chnong Mukroh hawa e yei klam hapoh ka yung dorbar ka Assam ynnin ka sngi.
Ka KSU WJHDU da pynche ko wa ka Mukroh toh kawa em hapoh ka West Jaiñtia Hills District nadooh wa da kha ya ka jylla Meghalaya ha u snem 1972. Chooh chooh ha kani ka chnong da chong da sah du da ki Pnar nadooh ki por yong rim wei haap ko leh hapoh ki Elaka wa Hima ki syiem Jaiñtia.
Ka seiñ da ong ko wa u Himanta da pynbaad u leh wa ki bru ka Assam Forest Protection Force wa ki Assam Police da ya kynaad ki wa kiwa tooh dieñ tangwa i yong sakhiat hi wa ini man ko ka riti dustur ka jaitbru wa i khloo toh ki yong ka chnong, ka raij wei ini mut ko wa toh i yong ki paidbah ym toh yong ka sorkar. Kamtæ ha man ki khloo hapoh ka Bri U Ynñiawtrep ki wym haap ha ki kyndon kiwa man kam ki Khloo Kyntang, ki Khloo Blai wa da yada da ka dustur riti, ha kiwi won ki khloo ye wow deiñ dieñ katkam i emkaam yong kiwa chong chnong.
Kamtæ da ong wa kamjooh leh ha Mukroh ki paidbah ki lai thoh dieñ ki na ki khloo yong ka chnong da kiwa chong chnong wa pynemkaam ya ki, wei toh ka hok yong ki nadooh i por u warim wajah wei ki sorkar khamtam ki sorkar yong kiwi ym em hok ki wow kamtre lane u tuklar ya ka hok yong ki Khasi ki Pnar.
“I kam u Montri Rangbah ka Assam toh iwa bakla chiboon bha wei pynyoo ko wa kwah u wow kam leh ya ka khloo chnong kiwa chong chnong ka Mukroh wei kamjooh leh ya ka chnong Mukroh waroh kawi,” da ong ka seiñ.
Chooh chooh da ong wa ki paidbah ka Mukroh deilang wa ki paidbah ka West Jaiñtia Hills wa ki paaid ka Bri U Ynñiawtrep waroh uwi ym e laad ki da kammon kammon leh wot chi inchi wa i thaw U Ynñiawtrep Ynñiawskum wow lai i cha Assam.
Ka KSU WJHDU da kyntu ko leh ya ka sorkar Meghalaya wa toh u leh ko iyi iyi hajrong ini i kamtre ka Assam wot hapyrdi i ya pynbait pood ki ar jylla, tangwa ka Assam won da kamtre ko ya ki chnong ka jylla ha man ki thaw wa em ha khappood.
