Hadien wa sdang pynpoor ki bru ha ki Social Media ya ka Poster wa khut ya ki paaid ka Shillong wow mih ki chakhmat ha kani ka 24 tarik yow paan laitlooid na ki Lockdown, i phah chim tika, u deiñ mask wa i phah test; iwa khut da ka Awaken India Movement kawa da ong wa ya ini daw leh ha kiwa boon ki sor ka India ha ka jooh ka sngi.
Heiwa ha Shillong da khut wow pynman da ka lai paidbah na Motphran chadooh Madan Iewrynghep (Fire Brigade) kam chibynta ka World Wide Rally For Freedom.
Hajrong ini, neiliang ka DC da ong ko wa kam kiwa chong chnong wa em yei kitkhlieh, waroh em i ya i bynta wow pyndooh ya ka khlam yow ye biang i wow im kamwa jooh.
Da ong ko wa ki Lockdown wa kiwi de ki kyndon toh yow lait u poi cha u pood wa ym ye de wow khang yei poor ka khlam kamjooh leh kiwa yap. Wei ya ki Mask da deiñ neidaw wa da chem dei stat sayan wa yarap ki wow yada nei poor i kjut katwa i tika won toh da tipmit da ka pyrthai ka laad wow yada na uni u khñiang kamjooh ki jait wa thymme wa mih na oo wei yow ye biang i wow im kamwa jooh.
Kamtæ da ong ko wa ini i khut pynman ya kani ka yalang man ko pyrchah ya ka aiñ wa ki hukum wa da pynkrehkaam wei ym em leh e bor wow pynman ya kani ka yalang.
Kamtæ ka DC da ong ko wa heithaw wow pynman ya kam kini ki yalang kiwa ye u man kam ki thaw pynpoor khñiang, da kyntu ya ki paidbah wow ya e ya ki kti yarap kam ki Volunteer ha ki Corona Care Centres lane ha ki Covid Transportation Cells.
Ka DC da ong ko wa waroh kwah i yei laitlood na u COVID-19 tangwa deiwa ya krehlang daw ye i wow yada wei wow jop ya kani ka khlam ym toh deiwa pynthut ya ini i ya krehlang.
