Ka yung krehkaam ka District Tuberculosis Officer, West Jaiñtia Hills ynne da kynmoo burom ko ya ka World Tuberculosis Day ha ka yalang wa da pynman ha District Library Auditorium, Jowai hajrong ka phang wa ong “Yes! We can end TB” deiwa emlang u Deputy Commissioner, u B.S. Sohliya kam u kongsan.
U kongsan hawa e yei klam da yaroh u ya ki Doctor kamjooh ki bru yong ki kiwa da ye wow pynduna ya kiwa yoh TB wei wow kreh leh yow poi cha ka thong pyndooh jait syndon yei kjut TB hapoh ka District. Chooh chooh da pynsñiaw u yei sñiawngooh leh ya kiwi kiwa da kreh yow booddien wei wow thooh ya kiwa yoh TB deiwa e mynsien ya ki wow ya krehlang ki yow poi cha ka thong.
U DC da pynlait paidbah u leh ya kawi ka Music Video kawa e Wyrta pynsñiawthooh paidbah chaphang ka kjut TB, kammon wow yada kamjooh wow yoh sumaar.
Neiliang ka Dr. Evalyneda B V Laloo, District Medical Health Officer kawa man leh kam ka District Tuberculosis Officer wa DACO waka Dr. Dasngewhun Shadap, MOTC Jowai TU da ban joor ki yaka thong wa ong “Yes! We can end TB” iwa mut wa ye hi u pyndooh jait yei kjut TB.
Ka Dr. Evalyneda da ong ko i kynmoo burom ya ka World Tuberculosis Day toh yow yoh leh u yaklam ya iyi wa da ye u pynkrehkaam yow pyndooh yei kjut TB deiwa ong leh wa i kjut TB toh iwa ye wow yada kamjooh wow sumaar pynchait lada wan smat ki wow pynyoo Doctor. Da ong ko leh wa waroh em i yei bynta wow leh yow ye u pyndooh jait noh ya ini i kjut.
Ha kani ka yalang da saam leh ki khusnaam yow tipmit ya kitu kiwa da kreh chitom yow yaleh pyrchah yei kjut Tuberculosis heiwa ka khusnaam kynthup ko ya TB Free Village Award, SNC Certificate/ Mementos, ka Nikshay Mitra Certificate, Best Treatment Supporter, Best lab Technicians, Best Performing ASHA wa Media Engagement.
Ha ki sngi chwa, da pynman ya ki yakob yaleh Sports neibynta ki khynnah skur LP wa UP wei da saam leh ya ki khusnaam cha kiwa jop ha kani ka yalang. Ynne ka sngi hei step won da sdang deiwa ya lai kjat da ki khynnah skur kiwa da rah ya ki Placard yow pynsñiawthooh paidbah kammon wow yada nei kjut TB deiwa lai luti na Ladthadlaboh, Newhill, Iawmusiang, DC Office, Stand War wei da pynkut ha District Library Mynthong, Jowai.
Discussion about this post