U President ka Khasi Student’s Union (KSU), u Lambokstarwell Marngar da ong u wa ka sorkar Meghalaya toh u chim ko yaka luti wa toh hajrong i klam kiwa mihkhmat na Karbi Anglong kiwa da pynbaad wa kiwa chong chnong ha Mukroh toh kiwa wan chong chnong pyrchah yaka aiñ.
Da ong u wa kam ini i klam toh kiwa e diñ, neibhah kammon wow klam deiwa kam wa katai ka thaw haap ko cha Assam, tangwa toh u pait yaka History neibhah ka District Council wa ki Hima, ki Elaka ki em ki yaki History wei ki tip yaki tre chnong kiwa da im pateiñ la pateiñ.
Da ong u wa boi i leh yong ka Karbi Anglong Autonomous Council toh chibynta wow tynrooh wow e diñ wei daw mih i umsnaam.
Uwa yahkhmat ka KSU da ong u wa katwa i pynbait ym pu poi cha ka bynta wa khaddooh, neiliang ka Assam wa ki Karbi ym toh u muchlia ware ki tangwa wow ap yei rai yong ki paidbah, ym toh u batai stat da kitu wa wan dang du chi sngi ar sngi.
Hawa kylli hajrong i rai yong ka sorkar wow thung yaka Judicial Inquiry, u Lambok da ong u wa i rai yong ka sorkar wow thung yei tahkit ka seiñ dang booddien yow chem yeiwa chimkhia lada man ko du kam wow yaklam ya sñiawthooh yumut.
Da ong u wa lada ka sorkar da em sakhiat ko yei yumut wow leh hok katkam ka luti yong ka aiñ wow tih yei tre, ym toh u pynslem wei ka seiñ daw klam biang ko hadien wa da bichaar, wei pynrap u wa katwa dang lai ka takit ya kitu kiwa emkti, toh u thap ki ha patok.
Hawa kylli chooh chooh hawa yatoh wa i rai yong ka sorkar wow booh noh ya ki Border Police Outpost, uwa yahkhmat ka KSU da ong u wa ka seiñ dadep ko wow e yumut ya ka sorkar da slem, kopsar kani ka rai da chim slem palat, wei pynsñiaw u yei kyrmen wa ka sorkar daw pynkrehkaam noh ko ya ini i rai. Da ong u wa ka seiñ ya ini i kaam leh daw booddien lada i rai wa chim ki ym toh du haka kot lane u pynkrehkaam smat noh ya kitai ki Outpost.
