I kreh chitom wa 8 bnai sepai i du hapoh 15 minit, tang i symbe leh ym yoh de

I rep i riang man i i kaam iwa eh khamtam i rep kba heiwa ki bru pynlut por ki da 8 bnai nadooh wow loor, u thung, u wær kat hadooh wow ah, wei man iwa tkut nood wa du chwa wow ah, u kba da tlor u nei bor ka ramaw.

Ynne i sngi hawa lai pait ya ki soo tylli ki chnong kiwa da chah ktah ha u phria uwa hiar ynnin i sngi heipor kamwa 2:30, da chem wa dang neh bait u ha ki hali, ki rood sarok wa kiwi ki thaw.

I haap u phria ynnin i sngi kynthup i ha ka chnong Pynthorlangteiñ, Muphlang, Mustem wa Iongnoh heiwa da sakhi wa u kba ha ki hali da tlor lut u.

Hawa yaklam wa u Waheh Chnong ka Mustem, u H. Shylla da ong u wa i kreh chitom ki warep da sepai lut i neibhah da pynlut ki yei por wei bor wow rep.

Da pyntip u wa hapoh ka chnong da em palat 150 yung kiwa da chah ktah wei ka kieñ u kba wa rep em u 340 tam kieñ (chi kieñ heh i thaw rep kamwa 1,338 Sq Mtr).

Neiliang u Waheh Chnong ka Iongnoh, u Hoping Bang da dap u dei sñiawlem ya kiwa chong chnong neibhah i wan u phria ynnin heipor kamwa 2:30 da pynsepai u ya u kba wa da kreh chitom kiwa chong chnong wow rep.

Ha Iongnoh da em kamwa 62 yung kiwa da chah ktah wei u kba wa da chah ktah da em u 155 kieñ.

U Waheh Chnong ka Muphlang, u Wallam Shylla da ong u wa i chah ktah ha ka chnong man iwa joor nadooh ki mar rep hadooh ki yung ki sem. Ki yung wa da chah ktah ha Muphlang em ki 25 tylli wei ki kieñ won 45-50 kieñ.

U A. Lipon, Waheh Chnong ka Pynthorlangteiñ da ong u wa ynnin heipor kamwa 2:40 da doom syndet i bneiñ wei da haap u phria wa joor, wei u phria da haap u ymtoh du chisien tangwa hadooh 3 sien. Da ong u leh wa i joor uni u phria da man i hadooh kattæ wa wot tang u symbe leh ym yoh de ki u booh.

Hapoh kani ka chnong da em kamwa 50 tylli ki manyung wa kamwa 115 kieñ u kba wa da dooh.

Neiliang kini ki waheh chnong da yachem lang ki heiwa da kyrpaad ya ka sorkar wow yarap ya ki warep ha iwon iwon i dur wow pyndap ya i emkaam yong ki.

Ynne i janmiet kini ki waheh chnong da e dorkhat ki cha u DC ka West Jaiñtia Hills wow paan yarap na ka sorkar la da ka poisa namo da iwon iwon i dur cha kiwa chah ktah.