Ka Wah Myntdu kawa kær talawiar ya ka chnong Jowai toh kawi na ka wah wa em naam wa psa umbaam umdih ya ki paidbah wa chong chnong ka Jowai, kamjooh leh ya ki warep ha Pynthorneiñ wa Pynthorwah, ha kani ka kynti da yoo wyrai u pait yei man i long kani ka wah neidaw wa da joor i chah ktah chah pynjæd pynpra chawa palat pood, wei ki dak ki chin yong i chah ktah yong ka dapoi chadooh ki thlu yung ka chnong Jowai kiwa pynemkaam umbaam umdih na kani ka wah neidaw wa ka umktieh wa jnah da ku syndon ko ha ki top pynlang um, ki kchu pynlang um ki paidbah wa chong chnong.
Hei lai sakhi ya ka thaw pynlang um ka chnat PHE wa em ha Oorkhla, Khimusniang, Jowai ha ka 23 tarik kawa man leh ka thaw pynkhooid ya ka um wa wan na Wah Myntdu wa Wah Umngot chwa u saam chaki paidbah, neiliang u SDO ka chnat PHE Electrical Division, u Roskil Challam da khana u wa neiliang yong ki da yaleh ki katwa ye u pynkhooid ya ka um wa poi ha kani ka thaw la ar tayaaw, nadooh ki top pynlang um wa tip kam ki Segmentation Tank, ki Clear Water Tank kamjooh ki Main Reservoir wa em ha Government Boys HS School, Jowai wa ha Dongmihsngi, Jowai tangwa ym ye de ki u leh iyi iyi. Hanla kattæ leh daw pteiñ chooh ki u pynkhooid sa ya ki top um wa em cha man ki dong ki chnat.
Ong u leh wa man-u-snem hawa poi u slap nyngkong ka um jooh ktieh hi ko, tangwa suk won u pynkhooid ymtoh kam ha uni u snem wa da poi beit da ka um ktieh.
Hawa kyruiñ won cha ki daw wa pynman ya ka Wah Myntdu u chah ktah ko, da sakhi toh neiwa leh hi ki paidbah heiwa du wow lait nei yong idæ da noh jhep, pynkai tngit cha ka cha Myntdu leh ym swe ki, wei du yow myntoi samen da noh khyndaw cha rood ka Myntdu leh.
Hajrong wow yada ya ka Wah Myntdu hei sakhiat nadooh u snem 2017 lyngba ka ujor u Sajeki Laloo pyrchah ya ka sorkar jylla, ka NGT da pynmih hukum ko wym hoi u pyntngit pynsih ya ka Wah Myntdu da kiwon kiwon ki rukom, namo u chna iwon iwon harood yong ka kamwa 50 meter, wei neiliang u DC ka West Jaiñtia Hills District leh neipor cheipor da pynkrehkaam u da ki kyndon 144 CrPC ha tymbud ka Wah Myntdu wa kynthup nadooh i khang noh jhep, noh khyndaw, tih chyiap, khloh moo wa kiwi tangwa i pynchitom ya kiwa leh pyrchah won wym em man salonsar.
Heiyatoh wa ini neiliang u K.L.Pariat, President ka Khooid Ya Ka Wah Myntdu kawa man ka seiñ wa pait kyrpang neibynta i bha i miat yong ka wah kawa da lai luti nadooh u snem 2021, ong u i jia ya ka Wah Myntdu katni toh iwa da yoo jngai nadooh ki snem chadien wei neiliang yong ki neipor cheipor da yaklam ki wa u DC ka West Jaiñtia hajrong i maa wa yang ya kani ka wah, tangwa ki chnat krehkaam sorkar wa kynthup ya ka PWD, Water Resources da kut du hei li pait donhi ya kani ka wah wei ya dih cha khlem kiwon kiwon ki kaam.
“Ha u snem 2021 heipor wa chna pynheh ya u sarok Jowai-Amlarem da ka Dhar Company da em i yaklam ka seiñ wym toh u noh khyndaw cha ki bynta wa tooid cha ka wah Myntdu wei u Contractor, u Ngaitlang Dhar leh da kular u, tangwa ha kani ka kynti ka jooh hi ka Company da noh syndon ko hapoh wah yei khyndaw wa mih neiwa pynkreh thymme ko ya u sarok wa pynyabi na yingkieñ Treiongriang cha Khliehtyrchi, wei neini i daw da nang joor i chah ktah ka Wah Myntdu”, da ong u K.L. Pariat.
Kamwa man katni ong u wym em de chaniah ki ya ka yung krehkaam u Deputy Commissioner neibhah wot hawa ka hukum ka NGT da em chwa ko leh wym em yoo ya ki kaam.
Iwa sah katu lada ym pynkhooid hi syndon ya ka wah, wei sangeh leh i pynkai khyndaw ye wow wan jia ka khlam lyngba ka um da ki kjut wa boonjait, neitæ i kyrdooh um ki warep kiwa chong chnong ka Jowai ha ki snem wow wan, wei lada kat ha utæ u pood ka sorkar toh u chim ko i kitkhlieh.
Discussion about this post