Shillong: U Montri Rangbah ka Meghalaya uwa man leh u National President ka National Peoples’ Party (NPP) u Conrad K Sangma da ong u wa i kylla ka saiñpyrthai ha Manipur toh neidaw wa ym sñiawsuk ya kiwa yahkhmat wei ym ktah ko ya i saiñpyrthai næ ka sorkar ha jylla Meghalaya.
Da pyntip u wa da dep yaklam leh waki Party kiwa emlang haka sorkar hajrong kani ka phang, wei da pyntikna wa ha Meghalaya ym jia kamwa jia yaka sorkar ha Manipur, deiwa pyntip leh waka Party da phah ko ya kiwa yahkhmat wow lai pynbait ya i long i man ka saiñpyrthai ha katai ka jylla.
Da pyntip chooh chooh u wa da yaklam waki MLA ka Party ha Manipur, heiwa da pynsñiaw wa toh neidaw wa thut i rukom krehkaam yong u Montri Rangbah, khamtam wa chim noh ya kattu katni ki chnat krehkaam naki Montri, tangwa iwa pynkylla yaka saiñpyrthai toh hadien wa 3 ngut ki MLA ka BJP da Resign noh ki.
Kam wow kdaw heini, ka sorkar wa yahkhmat daka BJP ha ka jylla Manipur da kyllooh ko hadien wa le ngut ki MLA ka BJP da Resign ki wa 4 ngut ki MLA ka NPP, uwi na ka Trinamool Congress wa uwi u Independent da dam ki wow kyrchaan yaka sorkar wa yahkhmat da u N. Biren Singh.
Da ini i kylla ka saiñhima sima, ka Congress ha ka jylla Manipur da pynkhreh ko wow lai yachem ya u Lat neibynta wow dawa wow khut yaka dorbar kyrpang yong ka yung dorbar chna aiñ.
