Ka Dorbar Chnong Umlyngsha, East Jaiñtia Hills lyngba ka u waheh chnong yong ka, u NL Talang da kyntu ya ki para jan chnong, jan thaw kamjooh ya kiwa wan baam-doh sñiawbha lada kiwa na jan næ na jngai leh toh wow man kiwa lehkmen dei mynsien wow pynemwarom lang chirup ya ka sngikha u Jisu Christ heijooh i por u lehkmen wow pdiang ya u snem 2022 deiwa ya tip bru tip blai.
Kamtæ ka chnong da kyrpaad ko ya waroh kiwa chong chnong kamjooh kiwa wan baam-doh wow sñiawbha u krehlang deilang wa ki bor ka chnong heiwa ym hoi u noh khiar ya ki Plastic, ki klong wa kiwi kiwi ki tngit ki jhep cha rood ka Wah Sailynter wa chapoh um heipor wa wan baam-doh cha ki wah wa ki loom kiwa em hapoh u pood ka chnong.
Ka Dorbar Chnong da khang pyrchah ko leh wa ymhoi u pynheh sur chawa palat kamjooh da maham wymhoi u klam ya ki ktien khlem akor.
“Kyntu i ya phi waroh wow krehlang chirup wa ka Dorbar Chnong kam ha kini ki samoi wa lehkmen neibynta i bha i miat yong waroh lang wei wow burom markylliang iwi ya iwi,” da ong u waheh chnong, u NL Talang.
Heijooh i por ka Dorbar Chnong da e khublei Christmas wa Snem Thymme wa suk wa kmen ko ya waroh ki paidbah yong ka Bri Yynñiawtrep.
