Jowai: Ynne ka sngi u BDO ka Laskeiñ C&RD Block, u Brighstar Langbang, da ong u wa dei mynsien wa sñiawkhia da kyntu u ya ki paidbah wa em hapoh ka Block wow bood ryntih ki ya ki kyndon wa da booh da ka chnat i chait i khiah heiyatoh kammon wow yada na u khñiang COVID-19.
U Langbang da ong u wa hanlada pynyinsur ya ki kyndon krehkaam ka khang chnong namo ka Lockdown, ymtoh wow man ki bru kiwa kheiñstiñ neibhah wa uni u khñiang ympu em u wiar u hadooh katni katwa kamtæ emkaam wow syndong wow sumaar i pyn ya idæ.
Neiliang uni u BDO da kyrpaad u ya kiwa chong chnong wow pynemkaam bait ki ya ki Mask hawa lai wa wan ki khamtam heipor wa em ki ha ki thaw paidbah neibhah deiwa leh kamni daw yada i ym du ya i tangwa wot ya ka yung ka sem kamjooh ya kiwi leh na uni u khñiang uwa da ktah ya ki lak tylli ki manyung ka pyrthai.
Chooh chooh da pynkynmoo u leh ya ki paidbah wa heipor wa em cha ki thaw paidbah wow yaleh ki katwa ye wow jngai iwi na iwi neibhah kani man ko kawi na ki laad wow yada na uni u khñiang kamjooh leh wow pynmlien wow sait ya ki kti neipor cheipor dei sabon namo da ki dawai Hand Sanitizer.
Da pyntip u leh wa heiyatoh wa ki Mask, ki paidbah ye ki wow yoh yutip na ki Self Help Group wa em ha ki chnong yong ki namo kiwa em hajan chnong khnang wow ye ki wow yoh ya ki (Mask).
Khaddooh neiliang u Langbang da kyntu kyrpang u ya ki Waheh Chnong wa kiwa kitkaam chnong wow chimkhia ki wow pynsñiawthooh ya ki paidbah khamtam ya ki tre chnong yong ki hi kammon wow leh khnang wow ye ki wow yada na uni u khñiang uwa rieh uwa ym em wa tip yi wa yoh namo wa rah ya oo.
