Hadien wa mih khubor wa da pynemkaam bakla ka Garo Hills Autonomous District Council (GHADC) ya ka poisa wa wan naka sorkar pyrdi kawa da ki klur tyngka yow wanrah ya ki kaam pynroi heiyatoh wa i chait i khiah wa ka umbaam umdih heiwa ya kani ka poisa da pynemkaam pathan wow su ya ka tulop ki wakreh, neiliang u Montri Rangbah ka jylla u Conrad Sangma ym bien u wow ong iyi iyi leh yeini deiwa ong wa ini toh i kaam pohyung ka GHADC kawa kreh laitlooid dei yong ka hi i bor.
U Conrad da ong u wa lada pynemkaam ki ya ka poisa wow wanrah yei kaam pynroi namo wow su tulop chong ha ki wei ym ye wow ong yei rukom pynemkaam ya ka poisa.
Da kdaw won u wa deiwa leh ki yeini daw ktah won ko yei yoh poisa khamtam kawa yatoh waka Scheme pynpoi umkor kawa tip kam ka JJM kawa toh neibynta ki paidbah tangwa da leh ki yeiwa leh ki deiwa pyrkhat ya ki wakreh yong ki yow su ya ka tulop ki, tangwa ini daw ktah ko ya ka poisa poilaiñ yow yoh ya ka bhah wa ar kani ka Scheme.
Da ong u leh wa kamni ym ye wow e ya ki Utilization Certificate (UC) wow pynyoo wa dadep pynkreh lut ya waroh ka bhah poisa wa da pynlait nyngkong yow yoh won sa ka bhah wa ar.
Chooh chooh da ong u wa ini daw ktah ko leh yei yoh poisa ya ka bhah wa ar namo ka Second Instalment yong ka KHADC wa JHADC neibhah ka sorkar India da pynlait ko ya ka poisa neibynta yong waroh ki District Council. Kamtæ ka 15th Finance Commission ka poisa toh wa pynlait chisien pynlait ya ka GHADC, JHADC waka KHADC.
Da kdaw u leh wa ini i rukom pynemkaam ya ka poisa daw ktah ko ya waroh ki kaam poisa poilaiñ ka GHADC wei ym em miat manda pait yei rukom booh yukheiñ ki wei kam kini ki kaam toh u yait u leh neini chakhmat.
