U CMD ka MeECL u Arunkumar Kembhavi ynne ka sngi da pynche u hajrong i dam noh wow su ya ka Pension namo ka bai baam tymmen nadooh u Wisu (April) uni u snem iwa da poi ka hukum naka Meghalaya State Electricity Regulatory Commission heiwa da kdaw u yei leh bakla ki sorkar warim hadooh wa da man ya ka chnat hadooh katni.
U CMD da ong u wa heipor wa pyman ya ka MeSEB kam ka Corporation yow pynkha ya ka MeECL ha u snem 2010, ka sorkar ha itu i por toh u booh ko da ka Corpus Fund namo ka poisa wa da booh cha rood yow pynlang kawa toh u man T. 840 klur heiwa na kani toh u su ya ka tulop, ki Gratuity Fund wa kiwi kawa man leh cha kiwa da lai Pension heiwa ya kani ka poisa ym em chim ya ka rai wa skem wow booh ya ka da ka sorkar warim.
Kamtæ da ong u wa na ini i daw da chem chitom katni heiwa lada booh wei pynlang ya kani ka poisa, katni da ye ko wow poi hadooh T. 1500 hadooh T. 1600 klur wei katni ym man ko iwa chongnia wow dawa hadooh kat kani ka poisa na ka sorkar.
Da khana u leh wa ini wadep neiliang ka Meghalaya State Electricity Regulatory Commission da phah ko wow dam noh u su ya ka Pension nadooh u Wisu uni u snem iwa da ktah bha ya kiwa da lai Pension wei da man ko leh iwa ym yahap wow leh kam ini para bru deiwa pynrap u wa lada ka MeECL su ko ya ka Pension na ka yong ka hi ka poisa da man ko iwa tyngkheiñ ya ki kyndon krehkaam ka MeECL wei heijooh i por pyrchah ya ka aiñ.
Hajrong ini da ong u wa da tyrwa kattu katni ki laad ki luti cha ka sorkar jylla wei dang ya krehlang hapyrdi ka Commission wa ka sorkar jylla wei da yooluti u wa ym slem de daw ye u pynbait ya ini i kaam iwa da toh wow pynbait nadooh u snem 2010 yow pynsuk ya kiwa da lai Pension.
