Ka chnong Jowai deilang wa waroh kawi ka ri da lehkmen ko ya ka Repulic Day kawa 73 ha ka yalang wa pynman ha madan Jrisaleiñ, Chutwakhu Jowai.
Ya ka lama ka ri da wan wow pynhær lama da u Symbood Montri Rangbah ka jylla, u Prestone Tynsong wei da chim u leh ya ka Rashtriya Salute deiwa emlang i tem yei rwai National Anthem.
Ha kani ka sngi da em leh yei pynyoo rong da ki chnat sorkar ya ki Scheme wa da pynkrehkaam ki wa ki kreh wa da ye ki u pyndep heiwa da em 11 tylli ki kari kiwa da pynriam pynbait kam chi bynta ka Tableau Display.
Ha kani ka sngi ym em u khut chimbynta deilang wa ki khynnah skur ha ka March Past heiwa da em du kawi ka kynhun pulit wa da chimbynta.
Neiliang u Prestone da saam u leh ya ki Certificate of Appreciation cha waroh kiwa wan wow e ya ki rwai ki chaad kamjooh ki heh ki chnat sorkar hapoh ka District kiwa da wanrah wow pynyoo ya ki kaam yong ki namo ka Tableau Display.
Ha Amlarem Civil Sub-Division won ya ka Republic Day da lehkmen ha madan ka Government LP School, Amlarem. Heiwa ya ka lama ka ri da wan wow pynhær da u Wailadmiki Shylla, MLA ka Jowai wei da yoh ya ki rwai ki chaad da ki khynnah skur.
Da saam leh ya ki Certificates of Appreciation cha waroh kiwa chimbynta. Ya ka Special Certificate da e cha u Nicholas Shylla ya i rwai sur Rap u.
Hapoh ka Laskein C&RD Block yaka Republic Day da lehkmen ha Hima Shangpung ha madan Hula, Moosyiem, Shangpung heiwa u Comingone Ymbon, MLA da wan u wow pynhær ya ka lama ka ri.
Ha kani ka sngi da yoh ya ki rwai, ki chaad, ka yaleh Skit na ka VO ka Shangpung Khliehmushut, VO Shangpung Pohshnong, ka Shangpung College wa naka Shlem Sur Tynre, Shangpung.
Da ekti leh ya ka kot ki sla i thaw noh jhep (Solid Waste Disposal Site) da ka Hula Mynshong Shangpung cha ka Synjuk ki Dorbar Shnong Shangpung.
