Da: U Chandame Sungoh
Hawa swæ wa tlar ki tyrpeiñ ki tympha,
Tæ kuhæ bait su yei wow yoh mynkna;
Dalut i khloo i kjam, da pat ki jri ki kya,
Da yaam ka Bei Rymaw, da klam bru ka poisa.
Ki Scheme sorkar wa boon wow ri sniang ri dakha,
Nadooh ki heh ki haaiñ wada chdit da khloh chwa;
Kiwa yoh myntoi neini leh da leh thok leh chutia,
Pynsmat dei yakob khwe wa smat u yoh poisa.
Ki masi baamdoh wa wan ha Khanapara,
Neini da dai tooh syndon chapoh Bangla;
Ku dor dohmasi chikilo ynru spah tyngka,
U chem yei eh tæ i kiwa dooh wa mylla.
Tip hi phi ma-ai ki buit u Conrad Sangma,
Pynku dor Petrol chi litar hadooh tamspah tyngka;
Tip phi ini waroh toh ka buit wa da em chwa,
Lada neh i ku dor tang chisngi da yoh da ki klur tyngka.
Kattæ leh dang ya bieij i ki Khasi Jaiñtia,
Ya kani ka Party dang kyrchaan tylli tylla:
Ya ki Party tre ri tæ wym em watip wa bna,
Ya ki Party Garo Party Dkhar ya pynjop ya rasa.
Hai-hai dawiar dangam, kamtu donhi paya!
Dang em wa stat wanang maai wa dang ye u pynbha?
Wow sap wow spaiñ yei mynsoo yei takha,
Chawa sep ka sngi wow beh ka tyr-ud ka pakra.
