Jowai: Ka 5 tarik u Naiynru (June) toh ka World Environment Day, ka sngi heiwa ki ri ha chityllup ka pyrthai ha ka thong wow pynneh pynsah yei miat yirngam ka Bei Rymaw wa ki soodong sookun yong ka da yaleh ki wow pynman ki kaam waphær waphær kiwa yahaap ha ka thong yong kani ka sngi.
Kam uwa thoh hawa poi kani ka sngi wan i sur waphalang hei pyrkhat yong nga chaphang u (T) Kambel Shullai, uwa da ieh yeini i pyrthai chongwasa (Bam kwai ha dwar u Blai) katwa ki kaam yong oo heiyatoh wei neh i sah ki dieñ ki siej man ki u mot sah-naam wym wiar wympleh de yanom neini na sla khyndaw pyrthai, iwa dei jabieñ wa stat wei chemphang i yong oo da ye u wow pynmih pyrthai ya ka Eco-Friendly Crematorium, kawi na ki rukom chna wa yada yei man i long ka Bei Rymaw wa ki soodong sookun yong ka kamjooh leh ka rukom chna wow pynsuk ya ki khon ka Niamtre wa ya kiwi kiwi ki bru kiwa chim u pynemkaam ya ka.
Hawa pynchong yurim ya kani ka Eco-Friendly Crematorium u (T) Kambel deiwa nujor næ wyrchaw yei rukom im wei man i long kani ka pateiñ heiyatoh wei rukom ye u pynneh pynnsah ya ka Rymaw wa ki soodong sookun yong ka, ye u ong wa oo toh uwi u bru u wow yoh yei naam i burom wa khroo heiliang i yada, pynneh pynsah ya ki dieñ ki siej wa i khloo i kjam heiwa yeini i stat i chemphang yong oo ka chnat Forest & Environment yong ka sorkar da chimkhia ko wow pynbna pyrthai leh cha kiwi ki chnong, ki thaw wei wot hadooh katni da em hadooh 78 tylli kiwa da chim wow chna ya kani ka Eco-Friendly Crematorium wei napyrdi kini em kiwa dadep chna, kiwa dang kreh wa kiwa daw sdang yei chna.
Discussion about this post