Jowai : Kani ka samoi toh ka samoi wow hiar rep ki bru cha ki hali ki pynthor wei chwa yeini kamwa jooh pynjooh ki warim da pynman yaka Chaad Sukra ha kylleiñ ka ri-loom Jaiñtia,
Ynne ka sngi u Wyrta da yoh u wow sakhi yaka Chaad Sukra kawa khaddooh dooh yong uni u snem kawa da pynman ha ka chnong Umlangchor haka Raij Mukhla.
Hachwa u sdang da em ka yalang heiwa da yoh yei klam na ki waheh ka Raij Mukhla kam u Langdoh, u Waheh Chnong, wa kiwi kiwi.
Kiwa klam ha kani ka sngi da ong ki wa ka Chaad Sukra katni da tip yaka ha kylleiñ ki thaw weiwa man ko kam ka dak wow tipmit ya i kam ka jaitbru Pnar, wei emkaam u kune i weiwow ka-it u tip kammon u pynemkaam ya ki tiar tem tiar put yong tynre.
Heijooh ipor da ong ki waheh wasian leh wa da em kawi ka thaw e sikai tem yaki tiar kiwa da booh ha chnong Nongrim wada thied daka Sieñ Raij Mukhla waka yung da e da ka Arts and Culture ka jylla.
Hadien ini da sakhi yei chaad hapoh ka yung dorbar chnong heiwa da sakhi ya ki paidbah wa dap smam ha kani ka yung wei da duk kiwa chaad u mih cha lait yow pynyoo yei sap yong ki.
Du hadien ar tylli ki sur u slap wa joor da hiar biang u heiwa da kyrriah biang yei thaw chaad chapoh ka yung dorbar, wei katwa joor i khynñia hapoh kani ka yung dei wym yohsa, da mih biang kiwa chaad cha lait heiwa da chaad ki ha u slap wa kiwa paitke dei ka-it mynsien da ksoh ki da ki satri katwa ki wym em won da chah bait ko yow slap.
Discussion about this post