Da u C. Pynsakhiat Yeini Kyndiah, Loompyrdi Iongpiah Jwai
Ka Behdieñkhlam toh i dur wow sakhi ka pyrthai,
Yei man kyrpang ka jaitbru katkam wa e u Blai.
Da pyndep daleh ya ka daki khon ka Niamtre,
Kiwa dang ksoh dang tbat yeiwa dep booh dep e.
Em ko ka nongrim kawa heh wayar,
Kat ka duriaw ka waheh i paar.
Kawa beh naphang yeiwa sih waroi,
U psiah klumar ha ka chnong ka thaw wymhoi.
I paan i doon ïynbar ïynthiang,
I jooh hawa pyndep i kñia i khriam.
Daka luti wa khooid duhai i pap,
Wymnood leh u paan dei mynsien arsap.
I ngooh i dem wa wyrchaw ya ki kti,
Wow ya chait lang ki khon ka ri.
Han i wa pyndep waroh i wa e,
Wymhun i u chait du ki khon ka Niamtre.
Em i jar i ngait, ya chonglang i hei jooh i phylloh,
Han la kattæ leh to ya ngooh Blai lang i waroh.
Deiwi i sur kam chidoh chi snaam donhi,
Ya kani ka khlam (Covid -19) u beh ika neini.
Ka chnong Jwai kawa biang ki nongker nongda,
U eh i maiñ yong ki hawa biang i bhah i bynta.
Behdieñkhlam wasuk wa kmen ya phi,
Yoh u ya chait ya khiah lang i.
