I dor i phñiang kari wa kynthup ya i Petrol wa Diesel hapoh ka jylla dang ku i kat dang mih ki sngi, wei ka sorkar Meghalaya Democratic Alliance (MDA) da rai ko wow chong bichaar ya ini i kaam hadien ka Election chitieñ samoi ka wow man ha ka 30 tarik uni u bnai, wei ya ini da ong da u Symbood Montri Rangbah ka jylla, u Prestone Tynsong.
U Prestone da ong u wa katkam wa man katni ymye u kular iwon iwon tangwa ka sorkar da chimkhia ko yeini heiwa u Montri Rangbah, u Conrad K Sangma da yaklam u leh wa ka Montri ka Muna Tanka ka sorkar pyrdi wei mar kut ka Election daw yaklam yeini kammon wow lait u chah ktah ki paidbah.
Da ong u leh wa i ku smat i dor i Petrol wa i Diesel man i ym du ha India tangwa ha ka pyrthai hi waroh kawi wei waroh ki khlieh ki ri ka pyrthai da yaleh ki kammon wow pynlait na ini i eh wa ktah ya ki paidbah waroh.
Heijooh i por da ong u wa ka sorkar jylla dadep pynduna chwa ko ya i dor i Petrol da kamwa T. 6 chi liter na ka dan wei du ha Meghalaya wa dadep pynduna lada nujor wa kiwi ki jylla ka thaaiñ mihsngi hadien wa ku i dor i Petrol wa Diesel ha ki kajiak bnai wa dadep.
Chooh chooh da ong u wa ymtoh iwa suk wow pynduna hadooh T. 6 chi liter, tangwa ka sorkar da pyrchang ko katwa ye wow leh yeiwa emkaam wow myntoi ki paidbah deiwa pynrap leh wa ki paidbah ymtoh u pyrkhat kulmar ki hajrong i ku dor i phñiang kari neibhah ini jia i ym du ha Meghalaya næ ha ri India.
Ha iwi i liang da beiñ joor u ya ka Congress kawa em ha ka liang pyrchah kawa da chim kabu yei ku dor i phñiang kari wa toh nei leh ka sorkar MDA deiwa ong leh wa du neidaw wa em ka Election chiteiñ samoi ha 3 tylli ki Constituency, ka Congress da pynbaad bait ko ya ka sorkar MDA wa pynku dor ya i phñiang.
