I phah ki DC ha kylleiñ ki District ka jylla ya ki dukan, ki yung krehkaam wa ki kari kamai wow pynyoo da ki dak wa thoh “VACCINATED” ya kiwa da dep yoh tika wei “NOT VACCINATED” ya kitu ki wym em chim tika da wanrah ko yei sñiawthooh bakla ha kiwa boon neidaw wa ka High Court ka Meghalaya ha ka hukum wa da pynmih ha ka 23-06-21 da ong ko wa ym pynbor ya ki bru wow chim tika.
Ha ka jooh ka hukum ka High Court da ong ko wa sñiawkhia ko yei artatien ki bru wow chim yei tika tangwa ini ym mut wa ya kitu ki wym chim yei tika u khang ya ki wow khih u khan ki tangwa hap pyrkhat leh ya i hok kiwa kwah wow yada ya idæ na kiwa em hei maa wow yoh na uni u khñiang, kamtæ da phah ya kiwa chongdai dukan, ki yung krehkaam wa kiwa kamai kari wow khana che ki lada ki toh kiwa da yoh tika næ ym pu em yow yoh ki bru yei hok wow jied ya kiwa da dep yoh tika lane kiwa ym pu em yoh tika hawa chong kari, hawa lai cha ki dukan wa hawa lai cha ki yung krehkaam.
Ka High Court ngait ko leh wow yada naka khlam toh du deiwa chim yei tika wei chong i ha ka jylla wow pynsñiawthooh paidbah chaphang i tika wa iyi wa yoh myntoi wei iyi i dooh myntoi. Wei toh leh u pynchitom ya kiwon kiwon kiwa yahbakla chaphang i tika deiwa ong wa ym em krehkaam namo ym e yada i na ka khlam.
Heijooh i por da ong leh wa ya kitu ki wym bien u pynyoo ha ki dukan, ki yung krehkaam wa ki kari kamai wa lada toh kiwa da yoh namo kiwa ym pu em yoh tika, da e bor wow khang ya ki wow leh yei kaam yong ki.
Heiyatoh wa i hok ki bru, ka yung bichaar da ong ko wa waroh em ki yei hok wow im, kamtæ hap pyrkhat leh ya kiwa boon neibhah wa lada deiwa leh uwi ar ki wym bien u chim tika, booh kylla ko ya kiwa boon won hei maa. Kamtæ deiwa phah pynyoo kiwon kiwa da yoh tika wa kiwon ki wym em yoh tika da pyrkhat lang yei hok yong waroh arliang. Neibhah i hok yong uwi ym toh u ktah won ko yei hok yong kiwi.
Ya kani ka hukum da pynmih hadien wa em ka mukotduma wa da yaleh pyrchah ya ka hukum ka DC ka East Khasi Hills District kawa da khang wow wai dukan, wow lai kamai lada ym toh kiwa da yoh tika iwa da pynkylla won hadien deiwa ong wa hap u pynyoo kiwon kiwa da yoh tika wa kiwon ki wym pu em yoh tika heiwa ka yung bichaar leh da mynjur ko ya ini.
Ka hukum ka High Court nawa sdang da ong ko i chim yei tika toh iwa emkaam bha katni yow ye u jop ya ka khlam wei i yoh yei chait i khiah wa ya i tika toh i hok ki bru kamjooh leh i hok wow im-ja. Kamtæ i hok ki bru wow yoh yei chait i khiah ym toh u chah ktah i ha i rai yong kitu ki wym bien u chim yei tika. Wei ka High Court leh u booddien ko yow pyntikna wa waroh kiwa toh wow yoh yei tika u yoh ki ki kamjooh yow pyndooh yei artatien ki bru.
Da e por leh 4 tayaw ya waroh ki Secretary ki District State Legal Services Authorities wow e ya ka bui (Report) cha u Member Secretary, Meghalaya State Legal Services Authority wa kammon da pynkrehkaam ya kani ka hukum.
Ya ka hukum ka High Court ye phi wow yoh heini.
