I pynmih khubor u Nehemaya Tyngkan, kyrtong ka Congress na 4-Mowkaiaw Constituency ha u WYRTA wa da chah beh u ha kiwa yahkhmat ka chnong Sahsniang da pynlyngngoh ko ya ki khynroo wa kiwi de kiwa sñiawthooh yei sakhiat.
Ki khynroo ka chnong da ong ki wa da yoo ki wa kiwa kyrchaan yong u Nehemayah da pynpoor ki ya kani ka khubor lyngba ki Social Media kam ka Facebook, WhatsApp ter-ter wei da em ka pynchit ya ki paidbah wow beiñ wei kawang ktieh ya ka chnong Sahsniang da ki kyntien ki wym yahaap næ wym emburom.
Katkam wa da tip wei sakhi da ki paidbah wa ha ka 20-02-2023, da em sakhiat i yoh bor na ka RO ka 4-Mowkaiaw wow pynman yalang ka Congress (8-10 waje i step) wa ka NPP ha (11 waje i step) ha Yaaw Sahsniang.
Wei ym ye wow len wa ha kani ka chnong da rap boon kiwa kyrchaan ka NPP bar ya ka Congress wei ki paidbah da yoh ki ya laad wow jied ya uwon uwon u kyrtong wa mon ki khlem iwon iwon i pynbor da ka chnong. Ki paidbah yoh ki ya ka hok wow pynkrehkaam ya i bor yong ki wei wow klam ya ka sur yong ki neibynta kawon kawon ka Party næ i rukom pyrkhat ha ka synchaar khadar. Waroh ki kyrtong na ki Party NPP, UDP, INC, TMC, BJP ki wow e reiñ na 4-Mowkaiaw Constituency yow man kam ki MLA da yoh ki wow pynman yalang lyngba i pyntip wei yoo biang ka Dorbar Chnong Sahsniang-A lane B ryngkat ki kyndon chnong wa ym toh u wan palat 4 kari kiwa bood yong uwon uwon u kyrtong.
Chwa itai i mih khubor, kam wow pynkynmoo wa uni u kyrtong ka Congress da yohlaad u wow psiah cha ki manyung ha ki dong yong ka chnong wei da dep u leh wow pynman yalang ha Sahsniang ha Madan Centenary (Sahsniang-B) ha ka 14-02-2023 wa ha Madan Mynsiang (Sahsniang-A) ha ka 18-02-2023 wei ym em i arsap ya uni wow khanglaad ya ki paidbah wow lai ap yei pynche yong oo hajrong ki phang wa kwah u wow pynsñiaw cha ki paidbah ymtoh kamwa da yahbakla u ha ki khubor wa da pynmih u.
Toh ka kamram wa kongsan ya kawon kawon ka dorbar chnong wow pait wei wow pynneh yei chongsuk chongsaaiñ wei wow chim ya ki rai rangbah wow yada chwa wow mih ki kulmar ha ka imlang sahlang.
Kamtæ da tip wa ha katai ka sngi ka 20 tarik daw wan boon ki paidbah cha kitai ki yalang yong ka NPP wa Congress kiwa pynman ha ki por wa yajan bha. Wei da sñiawthooh wa ye u mih i kulmar kiwa ye u pynthut ya ka suk ka saaiñ. Kamtæ kiwa yahkhmat ka chnong da hiar ki cha ka yaaw wei ki da phah pynsangeh chwa ki yei tem sur wow yaklam sñiawthooh wa u Nehemayah wei da kyrpaad leh ya oo wow pynman yalang ha kawi won ka madan wa em harood sarok hapoh chnong hi wa jngai du 300 meter na ka yaaw lane ha Madan Rikanan kawa rap jngai na ka yaaw. Tangwa da kyntait u yeini wow yah ya kiwa bood u na katai ka thaw wei da pynsñiaw won u cha ki laad pathai khubor deiwa pynbaad wa da chah beh u ha kiwa yahkhmat chnong kawa da man khubor wa yahbakla ya ki paidbah ki wym tip yei sakhiat.
Kam wow pynkynmoo wa ha ki snem wa nachwa waroh ki kyrtong jooh burom ki wei kohngooh ki yei pynlai chnong wei ki paidbah kiwa mon ya ki da bood wei synraan ki ya ki kyrtong wei da lai ki leh wow ap dei mon laitlooid.
I burom i ya u Nehemayah kam uwi na ki rangbah yong ka thaaiñ wei kam u kyrtong cha ka Meghalaya Assembly tangwa ym ye wow pdiang yei pynbaad yong oo. Ma dei pynman u ya ka yalang ha katai ka thaw wa biang wa ka dorbar chnong tyrwa ko, ki paidbah daw yoh ki wow ap yeiwa klam yong oo tangwa deiwa kyntait u da pyndooh laad ya ki paidbah kiwa da kwah wow ap ya ki phang wa kwah u pynsñiaw.
I kyrpaad i ya ki paidbah khamtam ya kitu wa chwa wow pynbaad wow sñiawbha u thooh yutip chwa yei sakhit wei wym toh u yahbakla neibhah ka Election wan wei lai ko tangwa ka chongsuk chongsaaiñ man ko kawi na ki paya wa emkaam tam ha ka imlang sahlang.
Ka kyrwoh na u Shlurbok Suchiang, u Medius Passah, u Ialamdame Lamare wa kiwi kiwi.
Puræ leh: Chah beh u Nehemayah heipor wa thmu u pynman yalang ha Sahsniang
