Neiliang kiwa chong chnong yong ka Mukhla kiwa haap hapoh ka dorbar pyllun dap ki dei sñiaw khyrngiat wei lyngngoh hawa yoo lyngba ki laad pathai khubor hajrong i rai yong ka Mukhla Dorbar Pyllun wow kyrchaan ya u Ailad Bhoi uwa man u kyrtong MDC ka NPP na ka 5-Mukhla Ummulong Constituency neibhah kam kiwa chong chnong ym tip ki næ embyntalang ha katai ka yalang dorbar yong ka Mukhla Dorbar Pyllun tangwa da rai khlem da khutlang ya ki paidbah yong ka Mukhla Raij waroh kawi kawa dapoi soo hajar tam kiwa thap Vote.
Da ong wa ka riti krehkaam (Constitution) hi yong ka Mukhla Dorbar Pyllun da klam che wa ka Mukhla Dorbar Pyllun hi ym ye ko wow ksohkti wa kawon kawon ka seiñ saiñhima (Political Party) næ kawon kawon ka liang kawa yatoh wa i synchaar khadar wot lada cha ka District Council næ cha yung dorbar chna aiñ ka jylla wa ka ri hi, wei ini wa da leh da pynkhyrngiat ko ya kiwa chong chnong kawa yoo wa kiwa yahkhmat ka Raij kiwa yahkhmat chnong ym em da burom ki wot ya katai ka aiñ yong ka Raij kawa da booh nadooh ki longchwa manchwa yong ka chnong ka Raij yong i kiwa da suit da choor deiwa paka yaka Mukhla Dorbar Pyllun waroh kawi.
Kam wow kdaw heini wa hapoh ka chnong Mukhla Raij hi waroh kawi da em ar ngut kiwa chong chnong ki wow e reiñ ha kani ka Election MDC ha uni u snem, kamtæ da ong wa kiwa chong chnong toh u man ki kiwa laitlooid wow jied ya uwon wa yoo biang ki ymtoh wow pynbor da ka Dorbar Pyllun neibhah kat katai ka rai wa ka dorbar da chim ko toh khlem da ap yeiwa rai yong kiwa chong chnong waroh tangwa deiwa em du kattu katni ki bru hawa nujor katkam i em ki manyung hapoh ka chnong hi waroh kawi.
Da ong leh wa katkam wa kam yong ka Mukhla Dorbar Pyllun wa waroh kiwa chong chnong u kyrchaan ki ya u kyrtong ka NPP toh iwa bakla wei ym ye u pdiang tangwa kam ki paidbah u kyrchaan laitlooid ki ya uwon uwon u kyrtong wa yoo biang ki.
Kamtæ da sñiaw kulmar wei sñiaw sarom sakhiat yeiwa leh kini ki waheh khlem da burom næ ap yei sur kiwa chong chnong ka Mukhla kiwa da thmu wow pynkhleh yei kaam Politics wa ki kaam ka chnong kawa ye wow wanrah yei ktah ya ka Raij wa emburom, pynkut ka kyrwoh na u Bitos Sari uwa man u tre chnong ka Mukhla kamjooh u kyrtong ka Congress uwa da yoh yei kyrchaan na ka Seiñ Kur Sari Mukhla Umlangshor ryngkat kiwa kyrchaan kiwa haap hapoh ka Dorbar Pyllun.
Puræ leh: Rai ka Mukhla Dorbar Pyllun u kyrchaan ya u Ailad Bhoi
Puræ leh: Kyrchaan ka Kur Sari Mukhla Umlangshor ya u Bitos Sari kam u kyrtong MDC na 5-Mukhla Ummulong
Discussion about this post