Ka High Court ka Meghalaya hawa bichaar ya ka mukotduma PIL heiyatoh wa ki Weighbridge wa em hapoh ka jylla, da ong ko wa em i hi i kubur naka sorkar wa ym em biang i rukom pait, rukom sylli yei kit palat pood ki kari heiwa ka sorkar da khana ko wa da em 14 tylli ki Weighbridge ha kylleiñ ka jylla.
Ka High Court da sñiaw ko wa kini ki 14 tylli ki Weighbridge ym dap ki hawa kheiñ wa em da hajar Kilometer u sarok hapoh ka jylla wei uwa ujor PIL leh da wanrah u ya ki sabut wow pynyoo wa ym em krehkaam wei ym em pynkrehkaam deiwa biang ya kini ki Weighbridge.
Neiliang ka sorkar da pyntip ko wa hadien wa da dep khut Tender, da pynlai ya kini ki Weighbridge da ki bru samen tangwa dang emkaam chiboon iwa hap wow leh heiwa ka High Court da ong ko wa kani toh ka laad ya ka sorkar wow chna poisa deiwa deiñ kuna ya ki kari wa kit palat pood kiwa lai lyngba ka jylla Meghalaya.
Ka High Court da mynjur ko leh yeiwa ong uwa yaleh mukotduma wa ka sorkar ym em pynkhreh ko iyi iyi leh kammon wow khang ya ki kari wa kit palat pood deiwa pynkynmoo leh ya ka sorkar wa lada ym ye wow khang yei kit palat pood, ka sorkar hap lutphut ko hei pynchna sarok khamtam manda joor u slap heiwa chah khoh lut ki sarok.
Ka High Court ym em sñiawhun ko wow yoo ya ka yukheiñ wa da yoh ka jylla neibhah wa da duna ware wei ym yahaap. Kamtæ da ong wa i pynchna ya u sarok toh u ye u pynmih chi bhah na ka kuna wa da pyndeiñ ha ki kari wa kit palat pood wei lada ym ye u leh yeini toh u khang syndon yei lai ki kari wa kit palat pood.
Ya kani ka mukotduma u chong bichaar biang ha ka 07-02-23.
